Bilbao an chak chiang

Thawhṭanni zan La Liga inkhel awmchhunah Athletic Bilbao an chak chiang a, an mikhual Levante chu 3-1 in an hneh - season tharah European football khelh ngei an tum chhunzawm zel.

Copa del Rey semifinal-a chak lo hlim Bilbao hian first half-ah goal khung lo mah se second half-ah Mikel Vesga, Inaki Williams leh Oier Zarraga ten goal khat ṭheuh an khung a, minute 88-naa Zarraga goal khung hi penalty aṭanga a chhuih luh a ni - Bilbao tana a goal hmasa ber a ni bawk.

Levante tan Jorge de Frutos chuan hun pek belhah goal khat a khung ve a, an goal chhuah a tam hret avangin scoreline cheimawina bak a tling lo thung.

Bilbao goal hmasa ber khungtu Vesga chuan, "Copa-a kan result duhawm lo tak aṭanga insiamrem nan chak hi kan mamawh a, European football khelh tumin a tawp thleng kan bei ang," a ti.

La Liga-ah palina chinin Champions League an khel ṭhin a, pangana chu Europa League group stage khel tur an ni a, parukna chuan Europa Conference League playoff round an khel bawk ang.

Bilbao hi table-ah pariatna niin, palina Atletico Madrid chu point riatin an phak lo mek - Champions League khelh phak a hautak tawh mai thei a, mahse, Europa League leh ECL playoff erawh an la beisei thei.