Rooney-a'n United hmachhawn dawn

Wayne Rooney-a'n FA Cup fourth round-ah Derby County a chakpui a, fifth round-ah a club hlui Manchester United a hmachhawn ang. Championship club Derby hian League Two club Northampton 4-2 in an hneh a, Rooney hian penalty aṭangin goal lina a khung.

iPro Stadium-ah Derby County-in Andre Wisdom (28') leh Duane Holmes (35') hmangin first half-ah goal an khung a, Nicky Adams hmangin Northampton-in minute 47-naah an siphurh an sut ṭhen.

Derby hlauthawng hman mah se minute 51-naah Jack Marriott-a'n goal thumna a khung a, Rooney-a'n minute 77-naah goal lina khungin scoreline lan mawi nan Sam Hoskins-a'n minute 84-naah Northampton tan penalty aṭangin a khung.

Wayne Rooney hian January thla khan Derby hi a zawm a, Philip Cocu hnuaiah deep-lying midfielder position chelhin player pawimawh a ni a. FA Cup-ah tho Crystal Palace 1-0 a an hneh ṭum pawhin Rooney hi player pawimawh a ni a, kum 34 mi hian a lar rualpui Cristiano Ronaldo te tluk tawh lo mah se mi bik a ni tih erawh a la lantir reng.

Derby boss Philip Cocu chuan, "Rooney hian career ṭha tak a neihna club a hmachhawn dawn a, inkhel danglam leh hlu tak a ni ngei ang," tiin a sawi. Rooney hian Manchester United tana a khelh hnuah Everton a zawm a, Goodison Park-ah January 1, 2018 khan United hi 2-0 in an hneh lo, FA Cup fifth round hi hemi hnua a hmachawn lehna hmasa ber tur a ni ang.