MPL7 Judgement Night ; Electric Veng Vs Chawnpui
Mc Dowell's No. 1 Soda Mizoram Premier League Season 7-ah kai thar pahnih Electric Veng FC leh Chawnpui FC ten semifinal beiseina an la nei a, team pakhat zawk tan hmun a awm niin a lang bawk.
Zanin dar 7:00 hian Electric Veng leh Chawnpui te hi an inkhel dawn a, hei hian knockout stage khel turah nghawng lian tak a nei ang.
Nimin tlaiah pathumna Mizoram Police an ha lo chiah bawk nen, zanin inkhel chak zawk tan semi final a hnai kuar dawn a ni.
Chawnpui Beiseina
Season ṭan tirhah Chawnpui FC-in semi final thlen an inbeisei pha lo a, amaherawhchu round 12 khelh zawhah thleng thei dinhmunah an la ding.
Chawnpui hian point 14 hmuin Electric Veng hi point thumin an pha lo a, an intawn hmasak zawka goal awm loa an inhnehtawk avangin hnehna an chang a nih chuan head to head hmangin EFC chungah an awm thei ang.
Round tawp berah Chawnpui hian an hnuaia awm Ramhlun North an hmachhawn dawn a, Chanmari FC inkhel result-ah innghat tel bawk mah se zanina hnehna an chang a nih chuan semifinal kawng hi a inhawng zau dawn.
Electric Veng dinhmun
Vanlalsawma Colney hote hi palinaah an awm mek avangin midang result-ah an innghat lo a, an hmabaka awm Chawnpui FC leh Mizoram Police an hneh ve ve chuan semifinal an khel dawn.
Amaherawhchu hriat tel atana ṭha chu Electric Veng hian Serchhip-a hnehna an chan hnuah Lammualah match nga khel leh tawh mah se chak hmel an la hmu leh lo.
Khel thei leh thei lo
Chawnpui tana chanchin ṭha lo chu midfielder Lalruatfela hliam vangin a khel thei dawn lo a, Chhinga Veng nena hnawhchhuah Lalruatfela chu hrem vangin an chhawr thei lo bawk ang.
Player pawimawh pahnih inhliam mah se an tum erawh a chiang. Chawnpui manager Lalzawmliana chuan, "Attacking game kan khel dawn a, chak tumin kan rawn inlan ang. Semifinal khelh kan duh a nih chuan point khat hmuh pawhin awmzia a awm tawh lo," tiiin Vanglaini a hrilh.
Electric Veng erawh Aizawl FC an hneh loh ṭuma inlan lo captain Isak Vanlalpeka, Vanlalhmangaiha leh C. Lalnunmawia ten hremna an hmang zo a, an inlan thei dawn a, an goal khung khawl David Lalchhuanawma erawh khup hliam vangin a dinhmun a chiang lo.
EFC coach Sawma chuan, "Kan khelh leh tur hi Mizoram Police a ni a, chuvangin Chawnpui laka point kan hloh hi a thiang lo," tiin chak ngei an tum thu a sawi.
Mipui an pawimawh
Chawnpuiin ṭantu an ngah lo a, a kal chhun erawh an thawm a ring. Electric Veng erawhin ṭantu an nei ṭha a, chutihrualin an au rual lo thung.
Electric Veng coach Sawma chuan, "Serchhip-ah kha chuan an ṭhu khawm vek a, player-te pawh an phur phah hle. Tunah erawh an ṭhu darh deuh a, thawm an nei pha lo. Kan veng mipui leh min ṭantute ka ngen duh chu MFA-in ṭhutna tura min zuah sak K. Kawla Stand-a ṭhu khawm turin ka sawm a ni," tiin entu lam nen ṭan a ṭul thu a sawi.