Semifinal kan la lut thei - Chanmari coach

Mc Dowell's No. 1 Soda Mizoram Premier League-ah vawi hnih champion tawh Chanmari FC chu panganaah an awm mek a, vawiin tlai dar 2:30 hian table mawngphaha awm Bethlehem Vengthlang nen Lammualah an inhmachhawn ang.

Chanmari FC hian match 12 aṭangin point 15 an hmu a, an chunga awm Electric Veng FC chu point hnih chiaha pha loin pathumnaa awm Mizoram Police lehpelh theih dan a la awm bawk. Coach Chawngthansanga chuan, "Bethlehem Vengthlang kan hneh thei a nih chuan semifinal beiseina hi kan la nei sang hle," tiin Vanglaini a hrilh a, an khelh hmabak thlirin a thusawi dikna hi a tam hle.

Chanmarians hian tun Inrinni hian Aizawl FC an hmachhawn leh nghal dawn a, I League club-in Zirtawpni tlaiah Chennai City nen an inkhelh dawn avangin Chawnga hote tan point thum hmuhna remchang a awm a, chutih rualin semifinal lut tur chuan vawiin tlaia BVT an hneh hmasak phawt a ṭul ang.

Chanmari tana thu lawmawm chu Ramhlun North nen an inhnehtawk ṭuma an chhawr theih loh C. Lalrosanga leh Lalmuanzova te an hmang thei tawh dawn a, BVT aia an squad a ṭhat zawk avangin point thum hmu tura rinkai zawk an ni.

BVT lam hi MPL khelh zel an duh chuan hnehna an chan a ṭul dawn a, Chanmari lakah inthlahdul a la thiang lo. Chanmari coach Chawnga chuan,"BVT hian relegate an duh dawn lo a, kan fimkhur a ngai a ni," tiin tawng pawng attack thei an la nih loh thu a sawi.

Chanmari hian match hnu-hnung berah BVT ang bawka tla thei dinhmuna ding Ramhlun North hmachhawnin point khat an hlawh chhuak hram. Chawnga hote hi BVT laka chak chiang tura dah a rem lo - BVT hi an fei a, an ṭang a, an huaisen bawk.