Aizawl FC kim loin Police kim hneh

Mc Dowell's No. 1 Soda Mizoram Premier League Season 7-ah Aizawl FC-in nimin tlai khan Mizoram Police 2-1 in an hneh a, I League club-in hmahruaitu nih tumin Chhinga Veng FC an um zel a, Police erawh semifinal khel lo thei dinhmunah an ding.

Lammual inkhelah hian Aizawl FC-in Isak Vanlalruatfela hmangin first half-ah hma an hruai a, second half ṭantirhah Malsawmfela hmangin Police-in siphurh sut mah se Lalkhawpuimawia (Mapuia) goal hmangin I League club an chak.

Kim leh kim lo

Aizawl FC-in Zirtawpniah Chennai City an hmachhawn dawn avangin an ṭhat dan berin Police an hmachhawn thei lo a, I League match hnuhnung bera Minvera Punjab hmachhawn lo player-te'n inkhel bul an

ṭan. AFC team hi B Team tia chhal theih ni mah se an match hnuhnung pathuma an chak vek avangin dah hniam theih an ni lo.

Mizoram Police erawhin match hnuhnung bera Bethlehem Vengthlang FC 4-0 a sawp tute an chhawr thei vek a, veteran midfielder V. Lalṭanpuia aiah rawlthar Eric Lalsangzuala an hmang a, player dang chu a ngai vek an ni.

Inkhel pawimawh chu

Team pahnihin beisei an pha lo a, Police-in bul ṭan ṭha hret mah se goal hmaah an hlauhawm pha lo. Semifinal lut tura point mamawh zawk Police an ṭang na tawk lo. Aizawl FC winger Isak-a'n first injury time-ah box pawn aṭangin goal kilah tak a khung a, keeper F. Lalmuanawma dem theih a ni lo. Second half-ah Police an insiamṭha a, Malsawmfela'n minute 51-na lekah R. Malsawmtluanga freekick pet chu a tauh lut.

Amaherawhchu Police an ṭang khawng rei lo a, substitution an siam danah erawh chak an duh ve ve tih a lang thung.

AFC-in Kelkang tlangval Mapuia leh V. Lalchhuanawma te an luhtir a, Police-in F. Lalrinpuia leh Lalsangbera te an luhtir ve bawk. Gift Raikhan-a substitution siamin awm zia a nei ta zawk a, minute 83-naah Rochharzela cross chu Mapuia'n a tauh lut a, chakna goal a ni zui bawk.

A nghawng

Aizawl FC-in an chunga awm Chhinga Veng an la hmachhawn dawn a, hmahruaitu dinhmun la luah thei an ni. Chu aia pawimawh zawk chu hnehna an chan avangin I League-ah an insawrbing thei ang.

Police erawh match hnuhnung berah Electric Veng an hmachhawn dawn a, an chak lo a nih chuan semifinal khel lo thei dinhmunah an ding a, round tawp ber inkhel erawh a hmuhnawm thung ang.