Real Madrid coach thar Santiago Solari

European champion Real Madrid chuan Santiago Solari chu an coach thar ni turin an lalut dawn a, he thuziak i chhiar meuh chuan Real manager a ni tawh hial ang.

Spanish Football Association chuan Real hnen aṭangin Solari chu an coach nghet ni tura pawmsak tura dilna an dawn tawh thu an sawi a, he thu buatsaih a nih lai hian Real erawhin thuchhuah an la siam lo thung.

Player a nih laia Real tana khel tawh Solari hi a tirah tak chuan manager lailawk tura ruat a ni a, mahse beisei aia result a neih ṭhat avangin coach nghet ni tur hian thutlukna siam a ni ta zawk.

A bul ṭan ṭhat

Real hian La Liga leh Champions League lamah beisei an phak loh avangin season ṭan dawna an lakluh coach Julen Lopetgui chu a hna aṭangin an ban a, manager nghet tura an beisei te nen inbiakna a hlawhtlin lawk theih loh avangin Solari hi manager lailawk atan ruat a ni.

Kum 42 mi manager hian match li an khelhah Real chu hnehna a chanpui vek a, goal 15 khungin an lamah goal li chiah a lut - Real chanchinah ani aia manager bul ṭan ṭha an la awm ngai lo!

Solari-a'n Real a enkawl tirh kha chuan La Liga-ah pakuana chiah an ni a, tunah erawh parukna niin hmahruaitu Barcelona an phak lohna chu point li chauh a ni tawh.

Buaina kara vanneihna

Spanish football-ah kar hnih chhung bak manager lailawk neih a thiang lo. Real hian Lopetegui an ban hnuah Antonio Conte chu an biak uluk ber a ni a, mahse an inrem thei lo.

Jose Mourinho, Roberto Martinez leh Mauricio Pochettino te hming pawh lamrik a ni a, mahse team enkawl lai nei vek an nih avangin Real tan duh angin thil a awlsam lo.

He boruak karah Solari-a'n beisei aia ṭha result a lo nei reng bawk si. Tlarhnung phui lo a phui sawt a, goal khung harsat Real-in goal khung an harsat tawh lo. Real tan coach dang zawn reng ai chuan Solari-a innghah hi thutlukna fin thlak a ni.

Result chu

Solari hian a match hmasa berah Copa del Rey khelin third division club Melilla a hmachhawn a, 4-0 in hnehna a chanpui nghal. La Liga-ah Real Valladolid hmachhawn zuiin 2-0 in an chak bawk.

Champions League-ah pawh a danglam lo. Lopetegui hoa Santiago Bernabeu-ah lehnghal 2-1 a an hneh hram Viktoria Plzen chu khualmualah 5-0 in an sawp a, Real fan-te an lawm.

Solari hian a match hnuhnung ber nia ngaih theihah Celta Vigo lakah Real hi 4-2 in hnehna a chanpui leh a, match li a enkawla an tlawmna awmchhun a ni.

Thlawpna ṭha

Kar hnih hnua Real B team lama tla thla leh mai tura an ngaih coach khan result ṭha tak a pe ta si a, Real-in La Liga-ah Solari pawmpui tura hming an pek luh hma hauhin Argentine coach duhna thawm a ring hle.

Spanish chanchinbu lar ten Real fan-te ngaihdan an lakkhawmna reng rengah a tam zawkin Solari chu an coach ni turin an duh zel a, players an bang bik lo.

Langsar tak takin Solari chu an coach ni hlen tura an duh thu an sawi a, tunah chuan player leh fan-te duhna tih hlawhtlin a ni dawn ta niin a lang.