Djokovic leh Zverev an chak

Novak Djokovic chuan ATP Finals khel lai player pariat zinga a ṭha ber nih a tum zia a lantir nghal a, a group match hmasa berah John Isner a hneh. Serbian tlangval ang tho hian Alexander Zverev pawhin Marin Cilic a hneh ve bawk.

Thawhṭanni zan khan O2 Arena, London-ah Gustavo Kuerten Group hian inelna an nei ṭan a, world number 1 Djokovic hian American tlangval Isner lakah hian 6-4, 6-3 in hnehna a chang a ni.

World number 10 Isner hi ATP Finals-ah a vawi khat inlanna chauh niin, set hmasa zawkah hian game nganaah a service a hum zo lo. Set hnuhnung zawkah pawh game sarihnaah hloh lehin nghet taka ding Djokovic lakah a tho chhuak zo lo.

Kum 31 mi Djokovic chuan, "Khawvela service nei ṭha berte zinga mi John lakah break point ka hmang ṭangkai thei, nidangah chuan thil theih loh ang hiala ngaih a ni ṭhin," tiin service nei ṭha chungchuang Isner service a chhuhsak thei chu a lawm thu a sawi.

Isner hian Djokovic lakah hnehna chang zo lo mah se, vawi 13 aces a siam thei tho. Hard court-ah hian a service nat ber ṭum chuan 140mph a nain a vawi thei a, a second serves ṭhenkhat pawh 125mph a tling ṭhin hial.

Inkhel dangah Zverev chuan Cilic lakah 7-6 (7-5), 7-6 (7-1) in hnehna a chang, German tlangval hian 2014 US Open champion nen hian an intawn hnuhnung parukah hnehna a chang vek.