Rooney thlahna inkhel zaninah nei dawn

England captain hlui Wayne Rooney chuan zaninah a tawp nan Three Lions jersey a ha dawn a, USA nen dar 1:30 hian Wem­bley Stadium-ah an inkhel ang.

DC United forward chuan, "England jersey hak lehna rem­chang ka nei thei hi ka lawm takzet a, kha leh chen ram tana ka inlan chhunga fan-te min

ṭawiawmnaa lawmthu sawina remchang tak a ni," a ti.

Kum 33 mi striker hian England tan match 119 khelin goal 53 a khung a, August 2017 khan Three Lions manager Gareth Southgate chuan ram tana inlan turin ko mah se a hnar a, England tana inkhelh a chawlhsan zui.

Chawimawina ropui

England leh USA inkhel tur hi 'The Wayne Rooney Foundation international' tih hming pek a ni a, English striker chuan Football Association-in a puala inkhel an hlan tur chu a lawm thu a sawi.

Rooney chuan, " Football Asso­ciation-in ka pual liau liaua he inkhel an hlan hi chawimawina ropui tak a ni a, naupang chanhai zawkte ṭanpuina remchang tak a ni nghal bawk a ni," a ti.

Rooney hian naupang chan chhe zawkte ṭanpui nan Wayne Rooney Foundation a nei a, England leh USA inkhela gate ticket hi a foundation-ah lut dawn lo mah se inkhel chhehvel aṭanga sum lut tam tak chu Rooney Foundation tan hian hman a ni dawn a ni.

A chiang lo

Rooney hi second half-ah substitute bench aṭanga luhtir a ni dawn a, a minute hman tur zat erawh Manchester United striker hlui chuan a chian loh thu a sawi.

English striker chuan, "Mi­nute eng zat nge khelmualah ka hman dawn ka hre lo. Manager Gareth Southgate nen kan inbia ang a, a thutlukna ang apiang chu ka zawm tur a ni mai," tiin a sawi.

Rooney hian a tawp nan England jersey ha dawn mah se captain armband hren tir a ni dawn lo a, a number hak ṭhin 10 chu hak tir a ni dawn lo bawk.

Zah phu Rooney

England coach Southgate chuan, "England tana a hna­thawh tawhte kha kan zah takzet a, ka player-te pawhin a sulhnu lo hnutchhiah tawhte kha an zahsak ka beisei a ni," a ti.

Rooney puala inkhel neih a ni tur hi sawiselna thawm a ri hman a, Southgate chuan hei hi a hriatthiam loh thu a sawi. English coach chuan,"England tana a hnathawh zawng zawngte thlir chuan kan chawimawi tawk lo a, sawiselna awm hian min ti hnual takzet.

"Mahse, inkhelh hun a lo thleng ang a, he ram tana a hnathawh lo awm tawh zawng zawngte uluk takin an thlirlet ang tih ka ring tlat a ni," tiin a sawi.

Ram tana sulhnu

Rooney hian February 12, 2003 khan Australia hma­chhawnin England tana a match hmasa ber a khel a, a hunlai hian kum 17 leh ni 111-a upa niin Three Lions tana inlan thei naupang ber a ni - he record hi Theo Walcott chuan a khum.

Kum 2003-ah vek hian Macedonia lakah goal a khung a, England tana goal khung thei naupang ber a ni zui a, he record hi tun thlengin khum a la ni lo.

England tan match 119-ah goal 53 a khung a, Euro 2004, 2012, 2016 leh World Cup 2006, 2010, 2014-ah te ram ai­awhin a inlan vek a, a sulhnu hi chhuan tham a ni.