Hong Kong lamah PV Sindhu

Tun kar chhung hian Hong Kong World Tour Super 500 tour­nament khelh a ni dawn a, badminton inelna ngaihhlut pakhat­ah hian PV Sindhu a inlan dawn.

Tun season chhungin Sindhu hian inelna khel ṭha ṭhin viau mah se a hmawr a bawk fuh tawk lo ṭhin, season hmasa khan Hong Kong-ah hian pahnihna dinhmun a luah; nomawi inchuhna inkhelah world number 1 Tai Tzu Ying a hneh lo.

Rio Olympic silver medalist Sindhu chuan, "Kumin chhungin Commonwealth Games, World Championship leh Asian Games-ah silver medal ka dawng a, a hmawr ka bawk fuh tawk lo ṭhin hi a pawi lai chu a ni. Tun ṭumah hian pakhatna nih tumin ka inlan dawn a, chumi tur chuan theihtawp ka chhuah ang," tiin a sawi.

Hong Kong World Tour Super 500 tournament-ah hian Sindhu bak­ah Saina Nehwal leh mipa singles player ṭha Kidambi Srikanth te an inlan bawk ang. Srikanth hi a match hmasa berah a chak a nih chuan India tlangval pakhat zawk HS Prannoy nen an intawng thei dawn.