Mercedes hi a ṭha ber - Hamilton

Formula 1 driver champion Lewis Hamilton chuan a awm mekna Mercedes chu khawvela car racing team ṭha ber an nih thu a sawi chhuak a, F1 team championship-ah Mercedes hi a zawna a vawi nga nan an champion tawh a ni.

Kar tawpa tlan zawh tak Brazilian Grand Prix-ah Hamilton hian hnehna a chang a, a nomawi kawl lai a humhim tih a chian tawh hnua hnehna a chan leh theih bakah a team a champion pui chiang nghal chiah bawk.

Britain tlangval Hamilton chuan, "Ka tan chuan intlansiak zawng zawng hi a pawimawh vek a, ngaihhlut leh chawisan bik sawi fak tur pawh a awm thei chuang lo. Tun dinhmunah chuan Mercedes hi team ṭha ber kan ni a, thawhpui ka neih ṭhat avanga tun dinhmun hi thleng thei ka ni," tiin a sawi.

Kum 33 mi Hamilton chuan sawi zawmin, "Mercedes nen hun rei tak kan thawkdun tawh a, ka tan chuan tun hnai season ruk chhung kan hman dan hi a ropui a, tunah chuan he team vang hian sulhnu ṭha ka hnutchhiah thei ta," tiin a sawi.