Chanmari damna Dampuia ; Bethlehem VT nge tla dawn Ramhlun North?
Chanmari FC-in Mizoram Premier League table mawngphaha awm Bethlehem Vengthlang FC chu injury time-a Laldampuia goal hmangin 2-1 in an hneh hram a, palinaa invawrh chhoin semifinal beiseina a nung thar bawk.
Bethlehem Vengthlang erawh point an hmuh zawh loh avangin MPL khel zel turin match hnuhnung berah Chhinga Veng an hneh a ngaih bakah Ramhlun North-in Chawnpui FC an hneh loh a ngai a. Chutihrualin BVT tan MPL khelh zel theih dan a la awm a, Chanmari tan semifinal a la chiang lo bawk.
Chance hlah nasa
Chanmari FC forward MC Malsawmzuala'n ṭan aṭanga rei vak loah Dampuia pass chu hnai set sawt aṭangin a pet over a, goal erawh an khung tho. Minute 15-naah Dampuia'n freekick aṭangin a khung.
Goal khungtu Dampuia'n goal dang a khung theihna tur hun ṭha ṭum hnih a nei a, a chance ṭha hneih hi goal-ah a chantir thei lo ve ve a, Chanmari dinhmun a him lo.
A tawpah Dampuia
BVT-in minute 43-naah an siphurh an sut a, Lalchhuanpuia corner pet chu H. Lalhlimpuia'n a tauh lut. Inkhel a nung thar a, BVT an khel ṭha zawk.
Bethlehem Vengthlangin relegate duh loin goal nawr an tum nasa a, Lalhlima'n goal venhim aiah goal nawr uar zawkin chance ṭha a hlah a, keeper MS Dawngliana chiah a hmachhawn hnuah a khung lo.
Chanmari lam talbuai hun tawp thlengin chak tumin an khel a, injury time-ah substitute Lalnunzama pass chu Dampuia'n chiang zetin a pet goal a, chakna goal a ni zui bawk.
Kan vannei - Chawnga
Chanmari FC coach Chawng-thansanga chuan, "Kan vannei, zep tur a awm lo. Kan khel ṭha lo a, mahse chak tumin a tawp thlengin kan bei a, point thum kan sual chhuak a ni," tiin Vanglaini a hrilh.
Semifinal chungchang sawiin Chawnga chuan, "Semifinal khelh theihna kawng a inhawng zau leh ta sawt a, amaherawhchu BVT pawh kan hneh ṭawk a, engmah hi a chiang lo," tiin a ṭawng pawr ngam lo.
Relegate tur?
Ramhlun North-in Zirtawpni tlaiah Chawnpuiah an hmachhawn dawn a, point an hlawhchhuah chuan Bethlehem Vengthlang FC an tla dawn.
Ramhlun North an chak lo a nih chuan BVT-in MPL khelh beiseina an la nei ang a, amaherawhchu pasarihna dinhmun luah turin Inrinni tlaiah Chhinga Veng an hneh a ṭul ang.