Chhinga Veng chakna Gatch

Mizoram Premier League champion lai Chhinga Vengin season danga an hneh theih ngai loh Ramhlun North chu tun season-ah ṭum hnih an hneh a, Thawhlehni zana an chakna hi Ivorian forward Gatch Diomande a ni.

Chhingcows hian MPL7 match 12 an khelh tawhah vawi kua an chak a, vawi hnih inhnehtawkin vawi khat chiah an chak lo a, Inrinni zana Chanmari FC an hneh thei a nih chuan league round-ah pakhatna dinhmun an nemnghet ang.

Vanneih a tel

Chhinga Vengin semifinal an lut tawh a, Ramhlun North-in knockout stage an beisei theih tawh lo a, inkhelah nghawng a awm tih a lang a, a hmuhnawm tawk lo.

Ramhlun North an khel ṭha hret a, goal hlauhawm hmuh tur a awm lo. Minute 43-naah Chhingcows midfielder Lalmuansanga ball pekluh chu Melory Lalrinsanga tan petchhuah nuam tawk ni mah se Ramhlun North defender hian a pet pial avangin Gatch-a'n hnai tak

aṭangin awlsam deuhin a khung.

Second half-ah inkhel a danglam tam lo a, Ramhlun North-in siphurh sut theihna hun ṭha an nei a, amaherawhchu substitute Alan Lalruatfela'n hnai tak aṭangin a hlah a, Chhinga Vengin point thum hlu tak an hlawh chhuak.

An fimkhur

Chhingcows coach Lalsangzuala Hmar chuan, "Chak kan la duh reng a, kan tumah kan hlawhtling. Hemi rual hian semifinal kan thlir tel a ṭul tawh a, kan player-te hi an inhliam kan hlauh avangin fimkhur takin player kan rem a ngai a ni," tiin Vanglaini a hrilh.

Chhinga Veng hian Inrinni tlaiah Bethlehem Vengthlang an hmachhawn ang a, Thawhṭanni zanah Aizawl FC nen league round match hnuhnung ber an khel ang.