Real-in Solari an puang ta

Real Madrid chuan an coach thar tura Santiago Solari an lakluh thu an puang ta a, kum 42 mi manager hian June 2021 thleng Real Madrid hi a enkawl dawn a ni.

European champion hian nimin khan thuchhuah tawite an siam a, "November 13-a Real Madrid Board of Directors ṭhukhawm chuan Santiago Solari chu kan coach ni turin kan pawm a, June 30, 2021 thleng Real Madrid-ah a cham dawn a ni," an ti.

Real Madrid hian Spain coach hlui Julen Lopetgui chu season ṭan dawn khan an lalut a, mahse an beisei ang result an neih theih loh hnuah a hna aṭang hian an chawlhtir.

Lopetegui ban a nih hnuah Solari hian October 29 aṭang khan Real hi a enkawl ṭan a, match li an khelhah hnehna chanpui vekin Real chanchina match hmasa palia chak nghal vek thei coach hmasa ber a ni.

Argentine coach enkawlna hnuaia match li an khelhah hian goal 15 an khung a, an lamah goal hnih chiah a lut thung.

Solari hi a tir takah chuan manager lailawk ang chauha lak a nih thu puan a ni a, mahse result a neih ṭhat piahlamah an coach dawr te nen an inrem theih loh avangin coach dinhmun a nghetin a luah ta a ni.

Real Madrid hian Chelsea boss hlui Antonio Conte, Belgium coach Roberto Martinez, Tottenham Hotspur manager Mauricio Pochettino leh Manchester United manager Jose Mourinho an dawr hman niin an sawi.