Second round-ah Sindhu leh Sameer
Rio Olympic silver medallist P. V. Sindhu leh Sameer Verma te chuan nimin khan an khingpui ve ve hnehin, Hong Kong Open World Tour Super 500 tournament-ah second round an in vaw kai.
Seeded pathumna Sindhu hian a match hmasa berah fiahna hautak a hmachawn nghal a, darkar khat chuang hret an inkhelh hnuah Thailand nula Nitchaon Jindapol chu 21-15, 13-21, 21-17 in a hneh hram, Jindapol nen an intawn tawhah vawi li a chakna chiah a ni.
Kumin chhunga Commonwealth Games, World Championship leh Asian Games-ah te silver medal latu Sindhu hian a match lehpekah chuan Korean nula Sung Ji Hyun a hmachhawn leh ang.
Mipa singles lamah Sameer chuan Suppanyu Avihingsanon 21-17, 21-14 in a hneh. Tun season Swiss Open leh Hyderabad Open champion hian a match dawtah Olympic champion Chen Long a hmachhawn leh dawn.
Commonwealth Games champion hlui Parupalli Kashyap pawhin a match hmasa berah hnehna a chang a, main draw khel turin a in vaw tling. A tawn san ber laia world number 6 ni tawh Kashyap hian a match lehpekah chuan seeded pasarihna Anthony Sinisuka Ginting a hmachhawn ang.
Thawhlehni khan Indian shuttler hian Chinese Taipei tlangval Hsu Jen Hao chu 21-7, 12-21, 21-18 in a hneh hram, player pahnih hi an inkhel tawk hle a, darakar khat leh minute thum an inkhelh hnuah Kashyap a vannei zawk.
Mixed doubles pair Satwiksairaj Rankireddy leh Ashwini Ponnappa te pawh chak lo zawk tura ngaih an nih hnuah an tho chhuak leh, anni hian Chinese Taipei duo - Wang Chi-Lin leh Lee Chia Hsin te ṭangdun chu 21-16, 19-21, 21-14 in an hneh.