Chennai City-in hma an hruai zel
Season ṭan hmaa rin kai phak lo Chennai City-in Indian football an barakhaih chhunzawm zel a, Thawhlehni zan khan East Bengal chu 2-1 a hnehin I League-ah hmahruaitu an nih chhunzawm zel.
Chennai City tan hian Sandro Rodriguez leh Nestor Gordilla ten goal khat ve ve an khung a, Kolkata club tan Mexican striker Enrique Esqueda goal khung a tawk zo lo.
East Bengal coach Alejandro Menendez chuan, "Inkhel inhnehtawk tak a ni a, team ṭha tak pahnih kan intawng a, annin an chance neih an chhawr laiin kan hun neih kan chhawr ve lo a ni," tiin a sawi.
Kolkata club tan hian captain Lalrindika Ralte leh Laldanmawia Ralte ten inkhel bul an ṭan a, bench-ah Lalramchullova leh Brandon VL Remdika te dah an ni thung - Brandon hi bench aṭanga luhtir a ni.
Chennai City leh East Bengal hi Aizawl FC-in RG Stadium-a an tawn leh hmasak tur pahnih an ni dawn a, a awlsam dawn lo.
South Indian club Chennai hian foreigner an nei ṭha a, midfielder Sandro Rodriguez, defender Roberto Eslava, midfielder Nestor Gordillo leh forward Pedro Manzi te hi Spanish player vek niin an ṭha hlawm hle.
Match hmasa bera 4-1 a Indian Arrows an hneh ṭum pawhin Indian rawlthar rual enkawltu Floyd Pinto chuan Chennai club-in foreign player an neih ṭhat thu a lo sawi tawh.
Zirtawpni khian Chennai City hi RG Stadium-ah Aizawl FC nena inkhel turin an rawn zin dawn a, November 24-ah East Bengal an mikhual leh ang.
Team Dinhmun
# Team P W D L GF GA GD Pts
1 Chennai City FC 4 3 1 0 11 6 5 10
2 Quess East Bengal 3 2 0 1 6 3 3 6
3 Mohun Bagan 3 1 2 0 5 3 2 5
4 Gokulam Kerala FC 4 1 2 1 7 6 1 5
5 NEROCA FC 4 1 2 1 3 3 0 5
6 Minerva Punjab FC 3 1 1 1 2 2 0 4
7 Real Kashmir FC 3 1 1 1 1 2 -1 4
8 Churchill Brothers 3 0 3 0 2 2 0 3
9 Shillong Lajong FC 4 1 0 3 4 8 -4 3
10 Indian Arrows 3 1 0 2 2 6 -4 3
11 Aizawl FC 4 0 2 2 4 6 -2 2