Premier League boss thar Dinnage

Khawvela football league ngaihven hlawh ber Premier League hotupa Richard Scuda­more chu executive chairman a nihna aṭangin thla tharah hian a bang dawn a, a hmun ruak luah turin Susanna Dinnage chu lakluh nghal a ni.

Kum 2019 tir aṭanga Pre­mier League hotu nihna chelh tur Dinnage chuan, "He hna ropui tak ka chelh tur hi ka lawm takzet a, Premier League hi mipui tana a hlut zia ka hria a ni," tiin a sawi.

Premier League hian hotu pahnih chiah an la nei a, Din­nage hma hian Rick Parry chu hmahruaitu hmasa ber niin Scudamore hian kum 19 chhung hotu ber nihna hi a chelh hman.

Mangṭha Scudamore

Kum 50 mi Scudamore hi November 1999 khan Pre­mier League executive chairman tur hian lakluh a ni a, English football-a league sang ber tana a hnathawh ṭha tak hian fak a hlawh hle.

November 1999-a league hotu nihna a chelh hian Premier League UK television rights chu pound maktaduai 670 hu vel a ni a, tuna a hlutna erawh pound tluklehdingawn 5.14 a ni der tawh!

Scudamore chuan, "Rei tak chhung he hmuna ka thawh ve a rem hi ka lawm takzet a, 'hna' tia han sawi tur atan chuan a nuam em em a, hlim takin ka hun ka hmang a ni," tiin a hna a mangṭha.

Scudamore thlah nan

Premier League club 20-te chu £250,000 ṭheuh English league sang ber hnenah hian pe tura tih an ni a, he pawisa tlingkhawm hi Scudamore thlah nan hman a ni ang - a tlingkhawm hi pound maktaduai nga vel a ni ang!

Scudamore hian Premier League-ah hian kum khatah pound maktaduai 2.5 a hlawh sa reng a, a thlah nan pound maktaduai nga pek a nih bawk chuan a hausak belh dawn hle tihna a ni.

Premier League club-te hi Chelsea chairman Bruce Buck chuan sum thawh tur hian a ngen a, he ngenna kaltlang tur hian Buck hian club 14 tal thlawpna a mamawh dawn thung - club panga chuan an duh lo chiang tawh niin khawthlang media te chuan an tarlang.

Tu nge Dinnage?

Scudamore thlaktu tur Susanna Dinnage hi media khawvelah chuan a mikhual lo hle a, hming langsar tak ni sa a ni. Premier League a zawm hma hian media organisation Discovery tan a thawk a, hemi hnuaia Animal Planet channel-ah hian global president a ni.

January 2009 khan Disco­very hi a zawm a, Discovery tana a thawh hma hian British television channel lar Channel Five-ah kum sawm chhung a thawk a, MTV aṭangin a career a ṭan.

Premier League nomi­nations committee chairman leh Chelsea chairman ni bawk Bruce Buck chuan, "Hna pawi­mawh tak chelh tura hruaitu ṭha tak kan nei thei hi kan lawm hle a ni," tiin a sawi.