Mission Veng Vikings tan beiseina a la awm ; Semifinal chu kan kutah a awm - Manager
Mizoram Super League champion lai Zarkawt BCA an hneh hnuah Mission Veng Vikings chuan semifinal luh beiseina an nei thar ve leh ta a, Vikings manager H. Lalhruaitluanga chuan a sang pali zinga an tel leh tel loh chu an kuta awm a nih thu a sawi.
Zarkawt BCA leh Khatla TBL ten semifinal an lut chiang tawh a, nizan khan Tuikual South chuan Zarkawt Serpents lakah hnehna an chang a nih chuan an tlang bawk ang. Zanin dar 7:30 hian Vikings leh BC Bethlehem an intawng zui leh nghal dawn a, MSL3 champion hian hnehna an chang a nih chuan an tlang thei dawn.
Thawhlehni zan Hawla Indoor Stadium, Republic Vengthlanga inkhelah Vikings hian 83-80 in BCA an hneh a, inkhel pakhat zawkah Khatla TBL chuan BC Bethlehem 103-96 in an hneh bawk.
Vikings beiseina
Mission Veng Vikings-in Zarkawt Serpents hneh chungin MSL5 bul an ṭan a, mahse Tuikual South leh Khatla TBL lakah an tlawm zui avangin an dinhmun a derthawng hman hle. Tunah erawh BCA an hneh leh tak avangin beiseina a nung leh tawh.
BCA lakah Lalhmachhuana leh Dijon Najee Farr ten point 23 ve ve an score a, anni pahnih bakah hian Zonunsanga (17points), Michael F. Lalawmpuia (8) leh Lalhlunmawia (8) te an khel ṭha hle bawk - anni hian zaninah Bethlehem lakah ṭha taka khelh nawn leh an tum ang.
Vikings manager Lalhruaitluanga chuan, "BCA laka kan khelh anga kan khel a nih chuan beiseina kan la nei. Player tinin chak duhna thinlung an pu a, tunah hian chhiarkawp dan chuan la tling lo mah ila midang kutah ni loin kan kutah kan hma hun hi a la awm," tiin Vanglaini a hrilh.
Chak lo zawk BCA hian an league match hnuhnung ber atan Zirtawpni zan hian Tuikual South an hmachhawn leh dawn. BCA coach Lalruatfela chuan, "Semifinal lut chiang kan nih hre sain kan khel a, kan inthlahdah phah chuang lo. Court chhungah player tin an ṭang em em a, hun tawp lama tihsual zeuh kan neih vang chauh chak lo kan ni, match lehpekah chuan chak kan tum ang," a ti.
TBL an ṭha
Semifinal lut chiang tawh mah se Khatla TBL chuan BC Bethlehem lakah zahngaihna an lantir lo, MSL season hmasa pahnih champion hian kai thar team hi 103-96 ngawtin an sawp thei, point 103 hi tun MSL khelh laia team pakhatin match mal khaia an score hnem ber ṭum a ni hial.
H. Laldinsanga kaihhruai TBL hian league round hmasa lam khan Tuikual South chu 102-83 in an hneh tawh bawk a, point score hnem lama an mahni record siam sa hi an khum leh chiah - team paruk inel zingah anni chiah hi match khata point 100 hmu tling thei an la ni.
Chak lo mah se BC Bethlehem hi fak tlakin an khel ṭha, an match hnuhnung bera an hmuh zat (96 points) hi TBL tih lohah chuan tun inelnaah an score hnem ber a, chutihrualin basket nei thei mah se an an defending a chhe thung. Zanina Vikings nen an inkhelh hunah hlauhthawnna nei loa an khel a nih chuan beiseina an la nei thei ang.
13 November, Nilaini
BC Bethlehem 96 - 103 Khatla TBL
Zarkawt BCA 80 - 83 Mission Veng Vikings
15 November, Ningani
BC Bethlehem 7:30 PM Mission Veng Vikings
16 November, Zirtawpni
Zarkawt Serpents 5:30 PM Khatla TBL
Tuikual South 8:00 PM Zarkawt BCA