Ozil-a'n Asia aṭanga sawmna a hnawl

Arsenal player zinga hlawh hnem ber Mesut Ozil chuan North London club tana contract thar a ziah hma khan Asia aṭangin sum tam tak hlawh turin sawmna a dawng a, mahse a hnawl niin a agent Dr Erkut Sogut chuan a sawi.

Germany international hlui Ozil hian kumin February thla khan kum thum daih contract a ziak a, tunah hian kar khat chhungin £350,000 a hlawh mek. Premier League player zingah Manchester United forward Alexis Sanchez (£500,000) chu hlawh hnem ber a ni mek.

Dr Erkut Sogut chuan, "Asia aṭang khan sawmna kan dawng a, a nihna takah chuan awihawm loh khawpa tam a ni. Inremna nei ni ila chuan kar khatah maktaduai khat a hlawh a hlawh tling thei ang.

"Mahse, Mesut tan pawisa hi thil pawimawh ber a ni hran lo, mipui hian sum aia football a ngaihpawimawh zawk zia hi an hriat sak ve chu a ṭul a ni," tiin kumin kum tir lama an thil tawn a sawi chhuak.

Real Madrid player hlui chungchang sawi zawmin Sogut chuan, "Premier League player zingah Mesut hian social media lamah chuan zuitu a ngah ber a, club chhungah pawh a jersey hi hralh hnem ber a ni bawk. A nihna takah chuan khawvel huapa mi hriat hlawh a ni, mi ṭhenkhat angin sum um ni sela chuan kawng dang pawh a zawh mai thei," a ti.

Kum 30 mi Ozil hi Russia World Cup-ah khan ram tan a inlan a, mahse beisei an phak lo. World Cup zawh hnuah ram tana inkhelh a chawlhsan zui nghal a, a kum la tam lo mah se club tan a hun pum a hlan thei tawh dawn a ni.