South Zone-in final lut

Mizoram Football Association Veteran League-ah South Zone chuan final an lut a, November 19, Thawhṭanni hian Lammualah final khelh a ni ang. Nizan khan group match hnuhnung ber khelh a ni a, North Zone leh East Zone inkhel result-in South Zone khingpui tur a hril ang.

Thawhlehni zan inkhel hmuhnawm takah goal riat zet a lut a, South Zone-in minute 16 chhungin goal thum an khung. R. Vanlalfela'n minute nga chhungin goal hnih a khung hman a, tun inelnaah goal ruk a khung der tawh a, goal thumna hi Lalthanpuia khung a ni.

Veteran football hi 30+30 khelh a ni a, West Zone tan Lalrinsanga leh Hmingthansanga ten goal hnih ve ve khungin first half-ah an lehthal a, goal class sang tak vek a ni. Amaherawhchu second half-ah South Zone an vannei a, injury time-ah Lalremtluanga freekick ṭha tak chuan crossbar a per hnuah Thanpuia hmangin an sut a, West Zone keeper che ṭha Ganesh-a tan dan theih a ni lo.

Point khat an hlawhchhuah zarah South Zone-in final an lut a, West Zone erawh nizan East Zone leh North Zone inkhel result-ah an innghat thung.