Thiem hnehin Federer a tho chhuak

Roger Federer-a'n ATP Finals a match hmasa berah hnehna chang lo mah se, a match hnihnaah chuan harsatna nei loin a tho chhuak. Thawhlehni zan inkhelah Federer hian Dominic Thiem hnehin semifinal a beiseina a chhi nung leh ta.

O2 Arena, London-a inkhelah Swiss thiampuipa Federer hian Austrian tlangval lakah hian 6-2, 6-3 in hnehna a chang a, a group match hnuhnung ber atan zanin dar 1:30 hian Kevin Anderson nen an inkhel leh ang.

Hnehna changtu Federer chuan, "Chak loh zawh hlima hnehna chan leh nghal theih hi a lawmawm zual duh bik hle. Nidang aiin vawiin chu court chhungah nuam ka ti a, ka tan London hi hmun nuam leh duhawm a nih chhunzawm zel ngei pawh ka beisei a ni.

"Anderson nen kan inkhelh tur hi nidang aia harsa a nih loh hram ka beisei, ani nena inkhelh hi a awlsam ngai lo. Wimbledon-a kan intawn ang em em a harsa kha ni lo turah ka ngai," a ti. Tun season Wimbledon-ah khan Federer hian Anderson hi a ngam lo.

Grand Slam vawi 20 champion tawh Federer hian a match hmasa zawkah Kei Nishikori a ngam lo. Mahse, Group Lleyton Hewitt inkhel dangah Japanese player hi Anderson lakah 6-0, 6-1 in a chak lo zui ve leh thung a, semifinal lut chiang leh chiang lo an la awm lo.

Kum 37 mi Federer tan a sang pali zinga tel tur chuan a match hnuhnung bera chak ngei a pawimawh dawn, hnehna chang pawh ni se Nishikori-a'n Thiem a hneh a, an point hmuh dan a zirin a la tla thei tho. Chutihrualin Anderson lakah Federer hi chak lo pawh ni se, inkhel dangah Thiem-a'n Nishikori a hneh thung chuan Swiss star hi a tlang dawn tho.

Player pali hi an inkhelh kual hnuah a sang pahnihin semifinal an lut dawn a, a hniam pahnih an tla thung ang. Hnehna chang hnem ber chu tehna hmasa ber tur a ni dawn a, player pahnih dinhmun inang an awm a nih chuan an pahnih intawna chak zawk an tlang ang. Player pathum an intluk leh a nih chuan set an lak hnem lam en tur niin, an la inang fo a nih chuan game an lak hnem lam en leh tur a ni.