Joe Cole a chawl ve ta

Chelsea midfielder hlui kum 37 mi Joe Cole chuan inkhelh a chawlhsan thu a puang ta a, "Engkim mai kha ka tan chuan mumang thleng dik ang mai a ni," tiin a sawi.

England tana vawi 56 inlana goal 10 khungtu Cole hian 2016 aṭang khan United Soccer League club Tampa Bay Rowdies tan a khel a, US second division club aṭang hian inkhelh a chawlhsan ta a ni.

Cole hian kum 17 mi niin West Ham tan a match hmasa ber a khel a, kum li hnuah Hammers-ah hian captain dinhmun chelhtir a ni. Kum 2003 khan Chelsea zawmin Premier League nomawi vawi thum a chawi a, FA Cup-ah vawi hnih a champion pui bawk.

Stamford Bridge-ah hian kum sarih hun hmangin match 281-a khelh sakah goal 40 a khung a, "Chelsea tana nomawi chawia ka hun hman zawng zawngte kha a danglam bik a, keimahah hian a cham reng tawh dawn a ni," a ti.

Chelsea aṭang hian Liverpool panin season khat a khel a, season khat dang chu loan-in Lille-ah kal tir a ni. Hemi hnu hian West Ham, Aston Villa, Coventry City leh Tampa Bay-ah te hian a khel leh a ni.

Chelsea midfielder Eden Hazard chuan, "Lille-a kan awm dun laiin Chelsea chungchang ka zawt a, Blues ṭhat thu nitinin min hrilh a, nomawi ka chawi tur thu min hrilh bawk. Cole vangin Chelsea ka zawm a, a chungah lawmthu ka sawi a ni," a ti.

Liverpool leh England captain hlui Steven Gerrard chuan, "Career duhawm tak avangin ka lawmpui che a, ṭhian ṭha leh player ṭha bik a ni. Nuam takin i chawlh chu hmang rawh," tiin an sawi.