Liverpool tlawm mah se an tlang
Champions League last 16 second leg-ah Liverpool an tlawm a, an khelmual hmanthiam Anfield-ah ngei Inter Milan chuan 1-0 in an hneh - goal awmchhun hi Lautaro Martinez khung a ni.
Liverpool tlawm mah se quarterfinal erawh an lut tho a, San Siro-a 2-0 a an lo chak tawhna chuan a chhanhim. Merseyside club hi inkhel pahnih belhkhawmah 2-1 in an chak.
Reds manager Jurgen Klopp chuan, "Football mawina chu kan tlawm pawha a pawi lohna bik game a awm hi a ni," a ti a, tlawm mah se an tlang tho avangin a lawm.
League Cup champion Reds hian Champions League bakah Premier League leh FA Cup-ah champion an la beisei a, quarterfinal an luh tho avangin lawm mah se Inter laka an khelh danin champion rim a nam lo.
Beiseina thamral
Liverpool-in first leg-ah 2-0 a hnehna an chan avangin fans thla a muang a, Anfield-a an khelh dan enin player pawh an thla a muang mah mah em ni chu aw, tih mai tur a ni a, insiamṭhat an mamawh.
Klopp-a'n an chesual thei an ni tih hre ran chungin, inkhelh hmain, "Inter hi khualzin satliah ang maia lo kal tur an ni lo," tiin a sawi a, Italian club hi chetsual zauha Reds hrem turin an ṭha tawk tih a hria.
Minute 61-naah German coach hlauhthawn a thleng zui - yard 20 vela hla aṭangin Martinez chuan shot ṭha zet a nei a, Alisson tan dan ngaihna a awm lo a, goal mawi bik a ni.
Inter-in beiseina an nei a, Reds ṭantute an hlauthawng. Mahse, Italian club hlim chhung a rei lo. Striker ṭha Edin Dzeko aia bul ṭantu Alexis Sanchez-a'n hlauhawm takin Fabinho a tlawh a, a yellow card pahnihna a hmu a, hnawhchhuah a ni.
Reds an vanduai
Tun season-ah Liverpool inkhel apiang a hmuhnawm emaw tih mai tur a ni a, Inter laka an inkhel erawh fans zingah hmuhnawm ti lo an tam zawk ang. Chutihrual chuan Reds hian inkhel an thunun tho a, Inter an ropui bik lo.
Liverpool hi an vanneih zan ni se chak thei an ni - an goal khung khawl Mohamed Salah chuan vawi hnih ngawt post a tih per a, Joel Matip chuan bar a tauh per bawk.
Luis Diaz aiah Diogo Jota chuan bul ṭan mah se a tawpa sawi hlawh erawh bench aṭanga luhtir Diaz tho a ni a, Colombian forward-in hnai set sawt aṭanga a shot Arturo Vidal-a lo dan hman chu uiawm tak a ni.
Minute 63-naah Sanchez hnawhchhuah a ni a, Manchester United forward hlui hian first half-ah hlauhawm takin Thiago Alcantara a tlawh tawh a, chawlhlawk hmaa hnawhchhuah a ni lo chu a vannei.
A vawi khatna
Kum 2022-ah a vawi khat nan Liverpool an tlawm a, March 2021-a Fulham an ngam loh hnua a vawi khat nan Anfield-ah an tlawm ta bawk - Klopp-a'n nomawi pali chawi a duh chuan a naute a fuih phur leh vat a ngai.
Reds hian an match hnuhnung 43-ah goal 109 ngawt an khung thei a, European football-a tlarhma hlauhawm ber pawl an ni. Mahse, Anfield-ah ngei Inter-in goal chhuah loin an veng thei a, team dangin Klopp-a naute hi an zuam sawt ang.
Liverpool tana lawmna tur erawh Trent Alexander-Arnold-a'n a ni tela hma a sawn hi a ni - English right back hi Inter lakah pawh a khel ṭha a, goal nawr kawnga a ṭangkai tluk zetin tlarhnung lam ven kawngah pawh hma a sawn tih a lang.
A tawpa Liverpool lawmna ber erawh an tlang chu a ni a, kum 1965 hnua a vawi khat nan Inter ngam lo mah se Champions League-a a thiam pariat zingah an tel - tun hnai season nga chhungin vawi li chu quarterfinal an lut.
Kan tum ber chu quarterfinal luh a ni a, chak loh vangin lawm lo mah ila tlawm kan duhna match thlang dawn ila, zanin kan inkhel hi kan thlan tur chu a ni ang.
Lawma zuang tawr tawr tur khawp chu ka ni lo a, mahse, kan tlang avangin ka hlim hle. Last 16-ah Inter kan tum dawn tih kan hriat khan a harsa dawn tih kan hre sa a, chuti chung chuan match hnihah a chungnung zawk kan ni a, tlang hi kan phu ve reng a ni. 'Ta se' tiin sawi ta ila, set-piece leh hun dang aṭanga kan chance neih zozai kha uiawm an tling a, kan chance neih kan hlah dan kha a nuihzatthlak zawk hial a ni - a tawp thleng khan chak thei kan ni. Mahse, a tawpah chuan tlang kan phu a, kan tlang ta a ni. - Jurgen Klopp, Liverpool manager
Kum 11 hnuah a vawi khat nan Champions League last 16 kan khel a, European football-a Manchester City leh Bayern Munich te nena team khauh ber kan hmachhawn zui a, anni aia kan hnufualna sawi tur a awm lo.
Match hnihah ṭha takin kan khel a, San Siro-a kan intawn hmasak khan kan khel ṭha zawk hial ang. Team hmachhawn hautak zet, tharum ngah leh thiam em em, kawng tinrenga buaina min siam theitu kan hmachhawn a, kan tiṭha a ni. San Siro-a kan result mawlh khan min run a, kha zana kan result kha a pawi em a ni. Sanchez kha khelmuala awm turin ka mamawh a, ani ka la chhuak hma lo kha inchhirna ka nei lo.
- Simone Inzaghi, Inter Milan coach
UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2 - 0 Lille
CHE: Kai Havertz 8'; Christian Pulisic 63'
Villarreal 1 - 1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1 - 1 Manchester United
ATM : Joao Felix 7'
MNU : Anthony Elanga 80'
Benfica 2 - 2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
March 8, Thawhlehni Zan
Bayern Munich 7 - 1 Red Bull Salzburg
BAY: Robert Lewandowski 12' (P), 21' (P), 23'; Serge Gnabry 31'; Thomas Müller 54', 83'; Leroy Sané 85'
RBS: Maurits Kjærgaard 70'
Agg-ah Bayern 8-2 in an chak
Liverpool 0 - 1 Inter Milan
INT: Lautaro Martínez 61'
Agg-ah Liverpool 2-1 in an chak
Nizan Inkhel (Result kan hre hman lo)
Manchester City 01:30 AM Sporting Lisbon
Real Madrid 01:30 AM Paris Saint-Germain
March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica
March 16, Nilaini zan
Juventus 01:30 AM Villarreal
Lille 01:30 AM Chelsea
*UCL-ah away goal rule a awm tawh lo.
*Second leg hi March thlaah khelh a ni ang.
*Quarterfinal a?angin draw neih ?hat leh tur a ni a, tute pawh an inhmachhawn thei ang.