CYMA buatsaih cricket leh volleyball inelna

Central YMA hnuaia Sports Sub Committee chuan kumin chhunga Branch YMA inelna tur atan cricket leh volleyball an thlang a, inelna buatsaih tur chuan Central Executive Committee (CEC) pawmpui a la ngai thung.

Kum 2020 leh 2021 chhungin Central YMA-in cricket, volleyball leh athletics inelna te buatsaih a tum a, Covid-19 hri lengin vangin a ṭhulh vek. Kum hnih chhungin Online Chess inelna chiah a buatsaih.

March 8, Nilaini khan Central YMA Hall, Tuikhuahtlangah Sports Sub Committee an ṭhu khawm a, kumin chhunga infiamna hmanga Branch inelna buatsaih ngei an tum.

CYMA hian hlawhtling takin inelna hrang hrang an lo buatsaih tawh ṭhin a, Mizoram chhunga infiamna chawi nun kawngah an thawh hlawk hle. Kumin tawp lamah FIFA World Cup a awm dawn avangin inelna buatsaih tur zingah football pawh sawi rik a ni mah se branch 100 chuang te an tel ṭhin avangin Covid-19 hri leng nen football inelna bik hi nakkum lama la ngaihtuah ṭhat leh tura dah a ni.