World leh European champion Chelsea inlan zan

Zanin dar 1:00 hian Carrow Road-ah Chelsea an lenglut dawn a, World leh European champion Blues hian Premier League table mawngphaha awm Norwich City an hmachhawn ang. Thomas Tuchel-a hote tan champion a har tawh dawn a, chutihrualin season thara nuam sa taka Champions League khel pha turin chak an mamawh.

Blues hian kartawp khan relegation zone-a awm Burnley an hmachhawn a, 4-0 zetin sawp mah se first half-ah goal an khung lo. German manager Tuchel-a'n relegate hlau team laka goal khung lawk loh hlauhawmzia a hrechiang tawh a, awlsam zawka chak turin goal khung hma an tum ang.

Nikum October thla khan Chelsea-in Stamford Bridge-ah Norwich City hi an mikhual a, 7-0 ngawtin an sawp. London club tan hian an fa chuam Mason Mount-a'n hattrick a siam a, Callum Hudson-Odoi, Reece James leh Ben Chilwell ten goal khat ṭheuh an khung bakah Norwich player Max Aarons-a'n an lamah a ti lut.

Carrow Road-a an inkhelh hnuhnun berah erawh Blues hi 3-2 chauhin an chak a, inchhuanna tham a tling lo. Chutihrualin zaninah hian Tuchel-a hote hi chak ngei tura ngaih an ni a, an squad a chhah ṭhat avangin Canaries tan point hlawhchhuah a harsa ang.

Blues hian league match hnuhnung pathumah goal an chhuah lo a, an chak vek. Tun season-a kar laihawla vawi li an inkhelh tawhah chak loh an la nei lo a, mahse ṭum thum ngawt an inhnehtawk.

Norwich hian kar laihawl inkhelah result an nei chhia a, match hnuhnung 13-ah chak an nei miah lo. Vawi 10 chak loin vawi thum an inhnehtawk. Canaries hian goal khung an harsat a, tun season-ah goal 16 khung tawhin a khung tlem ber an ni.

Dean Smith-a hote hi inelna hrang hrang match hnuhnung pangaah an chak lo vek a, match 27-ah point 17 chauh an hmuh avangin tla tura rinkai ber an ni ta. Chutihrualin Canaries hian team ṭha Blues laka point an hmuh theih chuan beiseina thar a nei ang.