December hnuah Bamford a inlan dawn

Leeds United-in zanin dar 1:15 hian Elland Road-ah Steven Gerrard-a kaihhruai Aston Villa an mikhual dawn. Whites hian coach thar Jesse Marsch hnuaiah point hmuh ngei an tum dawn a, Patrick Bamford a dam tawh avangin Villa laka result ṭha neih beiseina a sang sawt ang.

Kum 28 mi Bamford inlan hnuhnun ber chu nikum December 5 daih tawh kha a ni a, Brentord lakah injury time-ah siphurh sutna goal a khung. Amaherawhchu English striker hi a goal khung lawmna lamah a inhliam a, tun thlengin a la inlan lo.

Coach thar Marsch hnuaia an match hmasa bera Leicester City 1-0 a an hneh loh ṭumin Bamford hi bench-ah a ṭhu tawh a, Villa lakah bul aṭan lo a nih pawhin bench aṭangin a luh tawh ngei a beiseiawm.

Leeds hian Argentine coach Marcelo Bielsa hnuaiah result ṭha an neih loh avangin American coach Marsch an lalut a, an insiamṭha chho mek. Whites hian point 23 hmuin table-ah 16-naah an awm a, relegate rim a nam ṭan avangin an mual Elland Road-a point hmuh a pawimawh hle.