Bayern tan Lewandowski a vul leh ta

Robert Lewandowski-a'n inkhelh ṭan aṭanga minute 23 chhungin hattrick a siam a, Bayern Munich-in Red Bull Salzburg chu 7-1 in an sawp. German champion hi aggregate-ah 8-2 in an chak a, quarterfinal an lut.

Thawhlehni zan inkhelah Lewy-a'n minute 12-na leh minute 21-naah penalty aṭangin a khung a, minute 23-naah khung belh lehin darkar chanve pawh tling loah hattrick a siam der.

Bayern tan Thomas Muller-a'n goal hnih a khung belh bakah Serge Gnabry leh Leroy Sane ten goal khat ve ve an khung. Salzburg-in 5-0 a nih hnuah Maurits Kjaergaard hmangin goal khat an khung a, an mualphona a hliahkhuh zo lo.

Lewy a thiam thlawt
Bayern Munich tlarhnung a phui lo a, Salzburg nen 1-1 in an inhnehtawk tawh. Austrian club zingah kum 1985 hnu lamah quarterfinal lut thei an awm lo a, Salzburg-in a thiam pariat zinga lut turin beiseina an nei.

Amaherawhchu Allianz Arena-ah Bayern-in an zia an chhuah a, mualneituin minute 10 chhung leka chance an insiam hnem hman avangin Salzburg tan zan a rei dawn tih a hriat nghal.

Box chhungah Lewandowski rilru a fim a, Salzburg defender Maximilian Wober laka a penalty hlawhchhuah chu minute 12-na lekah chiang zetin a pet goal. Minute 20-na chhoah Lewy hian Wober bawk a vir khum a, VAR hmanga ennawn a nih hnuah penalty an pe. Polish striker hian keeper Philipp Kohn pawh a bum nawn a, minute 21-naah goal hnihna a khung.

Minute 23-naah Lewy-a'n hattrick a siam zui a, a vannei tel. Polish striker hian keeper Kohn pet chhuak tur chu dang hmanin hemi per hian goal ban a per a, hemi per hi goal ruakah Lewy hian a su lut.

Bayern striker Lewandowski hattrick hi Champions League bika rang ber ni mah se hun mamawh rei lo ber erawh Bafetimbi Gomis a ni thung. Kum 2011 khan Gomis hian Lyon tan Dinamo Zagreb lakah minute riat chhung lekin hattrick a siam a, 7-1 thoin an chak.

Lewy hian Champions League-ah goal 85 a khung ta a, Lionel Messi aiin match thumin a mamawh tlem. Cristiano Ronaldo aiin match 17-in a mamawh tlem zawk a, kum 33 mi Polish striker hian Ronaldo (140) leh Messi (125) te khum tur chuan record duha tuihal chiah a mamawh.

A goal zel
Goal thumah Bayern Munich an lungawi lo a, minute 31-naah Kingsley Coman-a siam chu Serge Gnabry-a'n goal-ah a chantir. First half-ah 4-0 a ni tawh a, chak tur chiang tawh mah se second half-ah goal khung hna an la chhunzawm.

Second half-ah Muller-a'n goal ṭha a khung a, Germany international hian amah vengtu a vir khum hnuah chiang zetin a pet goal. Salzburg-in counter attack hmangin goal khat an chhanglet a, minute 70-naah Maurits Kjaergaard-a'n kawh zetin a pet goal - keeper Manuel Neuer dem theih a ni lo.

Bayern an talbuai phah lo a, Muller-a'n minute 83-naah Leroy Sane siamsak chu 'cool' takin a khung. Minute hnih hnuah Lewy-a'n mawi zetin Sane tan a khensak a, Man City forward hlui hian Bayern goal sarihna a khung. Germany champion-in 7-1 in hnehna an chang a, first leg nena belhkhawmin 8-2 ngawtin an chak.

Bayern tak tak
Bayern Munich-in an theihna an lantir leh ta a, captain Manuel Neuer-a'n hna ngah lo mah se khelmual chhunga a awm hian danglamna a awm tih a hriat theih. Germany no. 1 keeper Neuer chuan, "Kan chak dan hmangin tu nge kan nih tih kan lantir. Chance pawh kan pe hnem lo a, tlarhnung pawh a nghet ṭha. Kan chhunzawm theih a ṭul ang," tiin a sawi.

Bayern manager Julian Nagelsmann chuan, "Kan khel ṭha tak zet a ni. Coach mit aṭang pawhin a ṭha. Game mawi khel chungin chance kan insiam a, goal khung loh ṭum pawh kan ngah. Chutichung chuan goal sarih kan khung thei a ni," tiin a naute inkhel danah a lungawi hle.