Match nga hnuah GSW an chak

A zawna vawi nga an tlawm hnuah Golden State Warriors an chak ve leh ta. GSW hian nimin zing khan Los Angeles Clippers chu 112-97 in an hneh a, tun hnaia an mangchhia aṭangin an harh chhuak.

Match hnuhnung bera inlan thei lo - Stephen Curry, Klay Thompson leh Andrew Wiggins ten inkhel bul an ṭan thei vek tawh. Clippers erawhin Kawhi Leonard leh Paul George te an chhawr thei lo thung.

Warriors lamin basket venhim lam an ngai pawimawh a, tun hnaia an chak lohna chhan nia lang an siamṭhat avangin harsatna lian tham an tawn lo. Quarter hmasa berah intluk tawk mah se, a hnu lamah GSW an chungnung a ni.

Nimin zing NBA regular season inkhel dangah Phoenix Suns chuan Orlando Magic chu 102-99 in an hneh. Western Conference hmahruaitu Suns hi an chetsual hnu an match hmasa berah an tho chhuak lehnghal, match 52 zet an chak tling ta.

Player nei ṭha, mahse che fuh tluantling thei lo Brooklyn Nets pawhin Charlotte Hornets chu 132-121 in an hneh. Cleveland Cavaliers leh champion lai Milwaukee Bucks te pawhin an khingpui ve ve an hneh bawk.

Nets tan Kyrie Irving chuan 3-points vawi kua ngawt a vawm lut a, hnehna an chan theih nan point 50 ngawt a nei - season kal laiah match khata point a neih hnem ber ṭum a tawng; Kevin Durant chuan point 14 a nei ve thung.

NBA - Nimin Results
Brooklyn Nets 132 - 121 Charlotte Hornets
Cleveland Cavaliers 127 - 124 Indiana Pacers
Phoenix Suns 102 - 99 Orlando Magic
New Orleans Pelicans 111 - 132 Memphis Grizzlies
Milwaukee Bucks 142 - 115 Oklahoma City Thunder
Los Angeles Clippers 97 - 112 Golden State Warriors