Europa League Barcelona mikhual tur Galatasaray
European football inelna sang pahnihna, Europa League last 16 first leg khel turin Barcelona chuan zanin dar 1:30 hian Galatasaray an mikhual dawn. Xavi hnuaia harhtharna an chan lai chu chhawm nun zel an tum ang.
Nizan khan last 16 inkhel pahnih a awm a, result kan hre hman lo. Russia leh Ukraine buaina vangin UEFA chuan inelna aṭangin Spartak Moscow a paih tawh a, an khingpui tur RB Leipzig chuan inkhel loin quarterfinal an lut.
Tlarhma an hriam
Barcelona hian goal khung an harsat ṭhin, manager thar Xavi rawn lan hnuah pawh an insiamṭha nghal mai bik lo. Mahse, thlasik bazar an hman hnuah erawh thil a danglam ta, tunah zet chuan goal khung an chawlhsan thei leh ta lo.
Pierre-Emerick Aubameyang chu tlarhma laia an hman thiam a ni der tawh a, mual sir lamah Adama Traore chu Barcelona khelh dan thiamsa a ni bawk. Ferran Torres an neih bakah hliam vanga chawl reng Memphis Depay a lo kir leh tawh bawk.
Catalan club hian inelna hrang hrangah a zawnin match thum chhung chu goal li an khung a, an match hnuhnung berah erawh Elche 2-1 in an hneh. An tlarhnung la remphui vek lo mah se hmatawng chu an hriam tawk hle tawh tihna a ni.
An inkhelhna tur Nou Camp a nih avangin Xavi nauten goal khung hnem an tum leh ang. An hmachawn tur Galatasaray hi an intawn hnuhnung vawi lia vawi thum an hneh theih avangin zaninah chuan chak zawk tura rinkai an ni ang.
Harh ngai
Turkish League-ah chuan Galatasaray hi team hlawhtling ber an ni, vawi 22 ngawt Super Lig nomawi an chawi tawh - anni aia club hlawhtling leh sulhnu nei ṭha reng an awm lo, tunlai an dinhmun erawh insiamṭhat an mamawh.
Season hmasa khan pahnihna ni chungin league an khar, an tluk loh Besiktas nen pawh an point hmuh a inzat. Tun season kal laiah erawh beisei an phak lo hle, Super Lig table-ah 12-na an ni mek, hmahruaitu Trabzon-spor an phak lohna chu point 32 zet a ni!
League aṭang chuan Champions League khel phak turin an tan kawng a ping chiang tawh tluk a ni, ticket an neih theihna hnai ber chu Europa League champion nih a ni ang, hei pawh kawng awlsam a ni dawn lo.
League match 28 aṭanga goal 37 khungtu hi an tlarhma a bil a, anmahni lamah goal 41 tehmeuh a luh bawk si avangin siamṭhat ngai lai an ngah hle. Domenec Torrent naute hian Barcelona khelmuala goal chhuah tlem chu an tum tur a ni ang.
Thurawn latu Moyes
Champions League group stage aṭanga tla Sevilla hmaah West Ham United an ding dawn. Hammers manager David Moyes chuan Spanish club an hmachhawn tur chungchangah Liverpool manager Jurgen Klopp hnen aṭanga thurawn a lak thu a sawi.
West Ham hian hmanni lawk khan Anfiled-ah Reds an ngam lo. Moyes chuan, "Kan inkhelh hma khan Jurgen ka bia a, ka player zingah thiam leh ṭha tak tak an awm thu min hrilh," a ti. Premier League chauh ni loin Europa League a sawi zuipui bawk.
Moyes chuan, "Jurgen kha Sevilla chungchang pawh ka zawt, thil ṭha tak min hrilhte kha hman ṭangkai ka tum dawn a ni," a ti. Klopp hian Liverpool a enkawl hnuah Sevilla hi vawi thum a hmachhawn tawh, hmachhawn dan tur a inzir nasa tawh ang tih a chiang.
London club tan hliam damkawr Jarrod Bowen a inlan theih a beiseiawm. Midfielder pawimawh Declan Rice leh striker tawnhriat nei Michail Antonio te an khel ṭha bawk a nih chuan Seville khawpuiah chak an tum ngam ang.
UEFA Europa League
Zanin Inkhel Tur
Sevilla 11:15 PM West Ham United
Rangers 01:30 AM Red Star Belgrade
Sporting Braga 01:30 AM AS Monaco
Atalanta 01:30 AM Bayer Leverkusen
Barcelona 01:30 AM Galatasaray
RB Leipzig CANC Spartak Moscow