Indian Wells khel tur zingah Djokovic

Novak Djokovic chu Indian Wells khel tur zingah a tel. Tournament buatsaihtu lam chuan Djokovic tel tur thu hi an tichiang a, tun ṭuma inelna leh US Open khel turin New York khawpui a pan thei ngei dawn em, tih erawh a la chiang chuang lo.

Serbian star hi Covid-19 vaccine la duh lo zinga mi a ni a, invenna a lak loh vang hian Australian Open pawh a khel thei lo. Tun hnai khan vaccine lak tumna a neih loh thu a sawi nawn, a ṭul a nih chuan tournament khelh loh mai pawh a duh zawk.

US-ah hian state thuneihna a sang, an state thuneituten an huam chhunga zin lut tur leh zin chhuak tur chungchangah thuneihna an nei. Hripui leng inkaihhruaina pawh anmahni siam an hmang tlangpui.

Indian Wells buatsaihtute chuan thuchhuah siamin, "Novak Djokovic chu inkhel tura hming tarlan zingah a tel. Mahse, hei hian sorkar thuneitu lamin zin lut turin phalna an pe tihna a ni kher lo," an ti a, zin chungchangah chuan thuneihna an nei tel lo.

Tournament-ah hian Roger Federer chu hliam vangin a tel dawn lo, world number 2 Djokovic hi a inlan thei a nih pawhin a ṭhat dan berin a la khel thei lo mai thei, kuminah tournament a khelh tlem avangin ngai a la awh chiah lo a ni.

Rafael Nadal a inlan dawn. Spanish star hian kuminah hneh loh a la tawng lo a, Indian Wells-ah hian a vawi li nan champion a tum ang. Player ṭha dang Dominic Thiem pawh inlan tura tih ni mah se, a inhnukdawk leh ta zawk.

Australian star Thiem hi a banrek hliam vangin a chawl rei ta hle. Indian Wells leh Miami Open aṭangin a inhnukdawk a, a inkhelh thiamna clay court season erawh hman ngei a tum thung.