Dortmund tan Haaland leh Reyna thiamna a tawk lo

Erling Braut Haaland-a'n goal a khung chhunzawm a, rawlthar duhawm Gio Reyna-a'n goal mawi bik khung bawk mah se Borussia Dortmund-in Werder Bremen 3-2 in an hneh lo a, DFB Pokal aṭangin an tla.

Wohninvest Weserstadion-ah Borussia Dortmund an lenglut a, manager Lucien Favre-a'n player ṭha chhawrin Marco Reus leh Jadon Sancho te bul ṭantirin rawlthar duhawm Haaland leh Reyna te bench-ah an awm thung.

Borussia Dortmund-in tlarhnungah ball an in pass ngam a, amaherawhchu tlarhnunga tihsual nghawng erawh a pawi. Minute 16-naah Dortmund right back Achraf Hakimi-a'n hmun hlauhawm laiah ball ti per sualin Bremen attacking midfielder Milot Rashica-a'n goal-ah a pet, keeper Marwin Hitz dan per chu  David Selke-a'n goal-ah a chantir.

Dortmund-in siphurh sut tumin an nawr let a, Mats Hummels-a'n box chhung aṭanga a back volley chu Bremen keeper Jiri Pavlenk-a'n a dang ṭha hle. Mualneitu bawkin minute 30-naah an khung a, Leonardo Bittencourt-a'n box pawn aṭangin kawh zetin a pet goal.

Lucien Favre-a'n siphurh sut tumin bench aṭangin rawlthar duhawm Haaland leh Reyna a luhtir, danglamna a awm. Minute 67-naah Julian Brandt-a cross chu Erling Braut Haaland-a'n goal-ah a chantir, Norwegian striker a hunah tak a hmunah tak a awm leh tawh!

Amaherawhchu, Dortmund tlarhnung pawp zeuh Bremen-in hmang ṭangkaiin minute 70-naah Milot Raschica-a'n dinglam aṭangin ṭha zetin a pet goal. Lucien Favre-a'n 'A thiam ti lo chu an mit a del a ni ang' ti hiala a fak Reyna-a'n a thiamna pholangin minute 78-naah ṭha taka petna tur khawp insiam chawpin box pawn aṭangin mawi zetin a hlai lut. United States international hlui Claudio Reyna fapa Gio Reyna a thiam tih nemnghehin a awm.

Dortmund goal khung khawl Haaland-a'n hun tawpah ṭha zetin goal zawnah tauh fuh mah se Bremen keeper Pavlenka-a'n a dang hman chiah chiah. Haaland leh Reyna te chet ṭhat zanah Dortmund an chak lo a, DFB Pokal nomawi beiseina a tawp.

Borussia Dortmund striker Haaland hian German club tana a khelh hmasak berah Augsburg nen minute 34 khelin goal thum a khung a, FC Cologne nen minute 25 khelin goal hnih a kung leh a, Union Berlin nen minute 77 khelin goal hnih a khung a, Werder Bremen nen minute 45 chhungin goal khat a khung. Norwegian striker hian minute 22 danah goal khung zel ang a ni a, match li lekah goal riat khungin vawi khatmah a la khel tluan lo.

Haaland hian goal riat khung tur hian minute 153 chiah a mamawh a, vawi riat goal zawna a pet chu goal-ah lut vek. Hun tawp dawn hnaiah Bremen keeper Pavlenka-a'n Haaland tauh goal tur a dang a, minute 180-naah a goal khung tur dang thei an awm ve chauh.