Europa Conference League: Round of 16 hun a thleng
European football-a club inelna sang pathumna, Europa Conference League round of 16 chu zaninah khelh ṭan a ni dawn a, Europa League hnuaia la awm mah ni se club langsar an awm nual avangin ngaihven a hlawh.
Jose Mourinho enkawl AS Roma chuan zanin dar 11:15 hian khualmualah Vitesse an lenchilh dawn a, Roma hi Serie A club an nihna piahlamah Mourinho-a enkawl an nih avangin an inkhel tur hi ngaihventu an tam.
Leicester City pawh zanin dar 1:30-ah an inlan dawn a, French club ṭha Rennes mikhual tur an nih avangin an inkhel a hmuhnawm loh ring suh.
Mourinho team
Serie A match thum a zawna draw result an neih hnuin AS Roma an insiamṭha a, an match hnuhnung pahnihah an chak ve ve - zaninah pawh Mourinho-a'n chak ngei a duh dawn a, a si ruk lain Netherlands an pan tura ngaih a ni.
Roma tan Serie A nomawi chawi turin thilmak a thlen a ngai tawh a, Coppa Italia-ah quarterfinal aṭangin an tla a, ECL hi nomawi an beiseina a ni. Mourinho-a'n Roma-a a season hmasa berah nomawi chawi a duh ang.
Italian club tan tun season-a goal 20 khung tawhtu Tammy Abraham chu innghahna tur a ni leh dawn a, match 25-a goal kua leh assist panga neitu Lorenzo Pellegrini pawh a langsar leh ngeiin a rinawm.
Leicester beiseina
Season hmasa khan FA Cup-ah Foxes an champion a, Premier League-ah pangana an ni bawk. Beiseina sang tak nen season bul an ṭan a, Community Shield-ah nomawi an chawi nghal a, a hnu lam erawh hlim taka sawi zui an harsat.
FA Cup fourth round-ah Championship club Nottingham Forest ngam loin an tla a, Premier League table-ah 12-na an ni mek bawk - chhuan tur an nei tlem a, ECL hi Brendan Rodgers-a tan beiseina a ni.
Europa League aṭanga ECL-a an tlak hlimin Rodgers-a'n ECL kalphung pawh a hriat loh thu a sawi a, mahse, inelna an hmachhawn meuh chuan champion a sawi leh tawh - an ti mai mai dawn lo tih a chiang.
Harhtharna
Foxes-in tun season-ah beisei phak lo mah se tun hnaiah an insiamṭha a, inelna hrang hranga an match hnuhnung pathumah an chak vek - an inrintawk vanglai tak a nih avangin Rennes tan a awlsam lo ang.
Leicester tan Jamie Vardy dam leh tawh mah se bul a ṭan a rinawm chiah lo a, Ademola Lookman, Kelechi Iheanacho leh Patson Daka te ho an la awm tho avangin lungphanna tur erawh a awm lo.
Hriatreng atana ṭha erawh Rennes hi group stage-ah Tottenham Hotspur leh Vitesse te nena awm hoin tlawm an nei lo a, an match hnuhnung pathumah chak vekin goal 10 an khung - an lamah goal thum chiah a lut thung.
Europa Conference League
Round of 16
Zanin Inkhel Tur - First Leg
PAOK FC 11:15 PM K.A.A. Gent
Vitesse 11:15 PM AS Roma
Slavia Prague 11:15 PM LASK
Partizan 11:15 PM Feyenoord
Marseille 01:30 AM FC Basel
Leicester City 01:30 AM Rennes
PSV Eindhoven 01:30 AM FC Copenhagen
Bodø/Glimt 01:30 AM AZ Alkmaar
March 17, Ningani Zan - Second Leg
FC Basel 11:15 PM Marseille
Rennes 11:15 PM Leicester City
FC Copenhagen 11:15 PM PSV Eindhoven
AZ Alkmaar 11:15 PM Bodø / Glimt
AS Roma 01:30 AM Vitesse
Gent 01:30 AM PAOK
LASK 01:30 AM Slavia Prague
Feyenoord 01:30 AM Partizan