ISL record thar siamtu Jamshedpur

India rama club football inelna sang ber Indian Super League pawh semifinal leh final chiah khelh a ngai ta a, league round-ah inkhel chanchin ngaihnawm tak tak hriat tur a awm nual.

Mizo player pathum awmna team Jamshedpur FC-in league match 20-ah point 43 hmuin league round champion an ni a, an point hmuh ang zat hi ISL season dangah hlawh chhuak thei an awm ngai lo - record thar an siam.

Bengaluru FC chuan 2017-18 season khan point 40 hmuin JFC dawta league round-a point hmu hnem an ni a, mahse, he season-ah erawh club 10 chiah an la awm avangin league match 18 an khel a, match hnihin Bangalore club hian an khel tlem tihna a ni.

Mumbai City chuan season hmasa khan point 40 an hmu ve bawk a, mahse, team tel pakhata an pun avangin season hmasaah erawh Bengaluru aiin match hnihin an khel tam.

League round-a hmahruaitu ni chung si a point hmu tlem ber pawh Bengaluru an ni a, Bangalore club hian 2018-19 season khan point 34 hmu chungin league table chung ber an luah.

ISL league round-a match khata an point hmuh ang zela chhut chuan Bengaluru (2017-18) an sang ber a, match khata point 2.22 hmu zel ang an ni.

FC Goa (2019-20) chu match khata 2.16 hlawh zel ang an ni a, pathumnaah match khata point 2.15 zel hlawh Mumbai City an awm.

Jamshedpur-in league match 20-ah goal 42 ngawt khungin an lamah goal 21 chiah a lut thung a, goal khung hnem ber dawttu niin, goal chhuah tlem ber an ni bawk.

Goal 43 khungtu Hyderabad-in an khung hnem ber a, goal 17 khungtu Chennaiyin chu goal khung tlem ber an ni.

Coach ban a hluar
ISL-ah team 11 an inel a, league round chhungin club pangain coach an thlak! ATK Mohun Bagan chu coach ban hmasa ber an ni a, December 17, 2021 khan table-ah parukna an nih laiin coach Antonio Lopez Habas chu inhriatthiam tawnnain an ṭhen a, FC Goa coach Juan Ferrando chu vaibelchhe 1.2 bawr velin an lei chhuak zui.

Goa-in coach Ferrando an chan avang hian Derrick Pereira chu coach turin an ruat a, ani hi an club technical director ni lai a ni. East Bengal-in December 28 khan coach Manolo Díaz an kaltir a, a hmun ruakah Mario Rivera lalut mah se, Diaz an ban laia an awmna tho table mawngphahah awm chungin season an khar tho.

Mizo tamna Odisha-in January 14 khan coach Kiko Ramirez an ban a, Kino García chu coach lailawk atan an ruat - Kiko an ban hian table-ah pakuana an ni a, pasarihna ni chungin season an khar. Chennaiyin chuan coach Bozidar Bandovic chu February 11 khan an ban a, season tawp thleng Syed Sabir Pasha kaihhruaina hnuaiah an khel - season an kharna erawh Bandovic an ban laia an awmna, 'pariatna' tho a ni.

Puitea'n assist vawi thum a nei
Mizo midfielder, MPL Under 17 aṭanga bul ṭan K. Lalṭhathanga'n ISL-a a season duhawm ber a hmang a, Kerala Blasters tan match 17 a khelhah assist vawi thum a nei - team innghahna a ni. R. Laldanmawia'n NorthEast United tan goal li a khung a, Sialhawk Express hi Mizo player zinga tun season ISL-a goal khung hnem ber a ni - match 13 a khel. Ricky Lallawmawma, Laldinliana Renthlei leh Lalengmawia ten league match 20 an khel kim vek. Season tluana match khel kim vek thei player hi coach-in an duh hle tih a chiang.

Gerrard-a duh loh; Jamshedpur lawmna
Scottish Premiership-ah Greg Stewart hming a mikhual lo. Kum 31 mi attacking midfielder hi Dundee, Birmingham City, Aberdeen leh Kilmarnock tan pawha lo khel tawh a ni a, a bik takin Scottish football-ah a mikhual lo.

Kum 2019 khan Steven Gerrard-a hnuaia khel turin Rangers a zawm a, season hmasa khan league nomawi a chawipui. Mahse, Rangers a zawm hmasak ber season-a match 25 kheltu hi season hmasa kha chuan match riatah chiah a inlan.

Liverpool legend Gerrard-a'n Stewart hi mamawh tawh loah inngaiin a chhuahtir a, Jamshedpur lawmah a tla. Men of Steel lam panin a puanthuah a rawn tel a, tifuh a la inti rih. Scottish attacking midfielder hian match 19-ah assist vawi 10 neiin ani aia assist hnem an awm lo a, goal 10 a khung bawk.

Si ban nghaktu rinawm
Kerala Blasters keeper Prabhsukhan Gill chuan match 17 a khelhah vawi ruk goal chhuah loh a nei a, match 18-a vawi ruk chhuah lo ve tho, Jamshedpur keeper TP Rehenesh nen an clean sheet neih zat a inang.
Rehenesh hi minute 85.26 dana goal chhuah ang a ni a, goal chhuah tlem ber a ni. Gill hi 76.53 dana goal chhuah ang a ni a, vawi 55 save nei a, save ngah ber, ATK Mohun Bagan keeper Amrinder Singh chu minute 69.23 dana goal chhuah ang a ni thung.

Record thar siamtu Bartholomew Ogbeche
ISL league round-ah Bartholomew Ogbeche chuan match 17 khelin goal 17 ngawt a khung a, amah hnaihtu, Mumbai City forward Igor Angulo (10 goals) leh Greg Stewart (10) ten an phak lo hle. Paris Saint-Germain striker hlui hian ISL-ah match 74 khelin goal 52 a khung tawh a, ISL record-ah ani aia goal khung hnem an awm lo - amah hnaih bertu Sunil Chhetri-a'n match 114-ah goal 51 a khung. Indian player zinga tun season ISL-a goal khung hnem ber chu Liston Colaco a ni a, ATK Mohun Bagan forward hian league match 20-ah goal riat a khung.

Midangte pass-tu Apuia
ISL league round-a ball pass hnem ber chu Edu Bedia a ni a, Goa midfielder ṭha mi hian match 16 a khelhah vawi 1254 ngawt pass a nei a, a pass dik zat chu 83.65% a tling. Mumbai City midfielder Lalengmawia (Apuia) chu ball pass hnem palina a ni phak a, Vaivakawn tlangval hian league match 20 a khelh aṭangin vawi 990 pass a nei.

ISL player man to ber Apuia hi match khatah vawi 49.15 zel pass chhuak ang a ni, tihna a ni a, a pass dik zat percentage hi 85.75% niin Edu Bedia ai pawhin a ṭha zawk. India international Apuia hian tackle pawh a ngah a, match 20-ah vawi 103 a nei a, league round-a tackle ngah lama a tluk loh awmchhun chu Bengaluru midfielder Bruno Silva a ni - Brazilian midfielder hian match 20-ah vawi 104 tackle a nei.
Apuia hian tun season ISL-ah hero of the match chawimawina vawi khat a dawng a, hei hi December-a 3-1 a Bengaluru an hneh ṭuma a dawn a ni.