Benzema lakah Messi telna PSG an tlawm

A si ruk lain Paris St-Germain an thawk chhuak a, mahse an hma a ding chu Real Madrid an nih miau avangin an paltlang zo lo. Spanish club hian striker ṭha mi Karim Benzema an neih avangin, chak lo tura ngaih team kha an chak.

La Liga hmahruaitu Real Madrid hian goal an chhuah hmasak hnuah huaisen takin an bei let a, a tawpah 3-1 a hnehna changin Champions League quarterfinal an lut; inkhel pahnih belhkhawmah 3-2 in an chungnung.

Benzema-a'n second half-ah hattrick a siam, goal pathum luh inkar hi minute 17 lek a ni.

Arab sum hmanga siam len PSG-in European football inelna sang bera hlawhtling tur chuan season thar nghah leh phawt a ngai. Neymar leh Kylian Mbappe kawppui tura Lionel Messi an lalut chung pawhin an hlawhchham.

A tirah chuan...
Santiago Bernabeu Stadium-ah Real Madrid ṭantute an pungkhawm a, inkhelh ṭan hmain Kylian Mbappe chu kut bengin an lo lawm! PSG forward hi an ta chei ṭan deuh der tawh, first leg-a goal awmchhun khungtu a nihna hre mah se an haw lo.

Nilaini zan inkhelah pawh Mbappe bawk a hmuhnawm. A tlan chakna leh ball thiamna hmangin Real Madrid tlarhnung a chhaih buai hneh viau a, a goal khung pahnih erawh offside vangin an hnawlsak.

Neymar-a'n hla deuh tak aṭanga a ball pek chu Mbappe hian a tlanpui a, amah vengtu David Alaba chet khalhin keeper Thibaut Courtois dan theih lohin goal kilah a khung, an intawn hmasaka an goal nen PSG lamin 2-0 in hma an hruai.

Marco Verratti-a'n midfield a thunun a, tlarhma lamah Mbappe a talput fo bakah Neymar leh Lionel Messi ten remchang an insiam zauh zauh, goal tam zawk nen Paris club hian quarterfinal an lut dawn niin a lang hman, hahdam takin chawlhlawk an hmang.

Changtupa Benzema
Team tam zawk chu ni se an beidawng tawh ang. Minute 45 chauh khelh hmabak an nei tawh a, goal hnih an phur bawk. Mahse, Real Madrid an ni miau a, inelna an khelh lai chu Champions League a nih bawk avangin an zam chhin eih lo.

Goalkeeper Gianluigi Donna-rumma a chetsual hma kha chuan PSG an nghet ṭha viau. Mahse, Italy international hian ball a pet chhuak har hret a, striker Benzema-a'n a va nangching hman, ball per dawngtu Vinicius Junior chuan Benzema tan awlsam takin a siamsak.

Midfield laiah Verratti aiin Luka Midric a chungnung tial tial a, an khingpui an nawr tawm zel. Croatian midfielder ball fing dawngtu Benzema-a shot chu defender Marquinhos chuan lo dang pialin a goal, minute 61 leh 76-ah goal an chhuah.

PSG an talbuai zui a, an goal hnihna luh aṭanga minute hnih hnu lekah captain Marquinhos bawk talbuaiin box chhung aṭanga zawitea ball a pet chhuah chu Benzema zawnah kher a kal, France international hian laklawh nei eih loin an chakna goal a khung.

Kan la dam
Man of the Match atana thlan Karim Benzema chuan Real Madrid chu an beidawng ve ngai lo tih a sawi a, eng inelna pawh ni se an tan chuan final anga pawimawh vek a nih thu a sawi chhuak bawk.

Benzema chuan, "Champions League leh La Liga lama kan khelh hmabak zawng zawng chu final ang vek a ni tawh. Tun ṭumah hian Real Madrid chu kan la dam a ni tih kan lantir. PSG kha chak tur angin an lang hman.

"An khel ṭhain a bul pawh an ṭan fuh. Second half-ah kan tum ang ngeiin goal kan khung thei a, kan chak theih chhan chu kan rilru paukhauh vang a ni," tiin a sawi a, an tan chuan UCL match hautaka hnehna chan hi thil thar a ni hran lo.

Real Madrid manager Carlo Ancelotti chuan, "Mbappe goal hnuah kha chuan a harsa tawh. A nihna takah chuan thil hrang hrang kha kan tuar nasa, goal khat kan neih hnuah erawh fans puihna leh beiseina nung hmangin kan ding chhuak," a ti.

Poch a lawm lo
Mauricio Pochettino tan Ligue 1 champion nih ringawt chu manager ṭha nihna a tling zo dawn lo. Argentine manager teh nana an hman tur chu Champions League hi a ni, an tehna aṭang chuan a tling zo rih lo.

An tlak danah Poch a lawm lo, referee thutlukna sawiselin PSG manager chuan, "Thil sawi harsa lo tak a ni, goal hmasa ber a luh dawn khan Donnarumma lakah Benzema kha a foul, kha khan thil a thlak danglam.

"Khatiang thutlukna dik lo kha chu ka hrethiam thei lo a, ka ngaidam thei ngai lo ang. Eng vanga VAR hmang lo nge an nih ka hrethiam thei lo, ka naute khan mak an tih em avangin an rilru a chiai," a ti.

Messi, Neymar leh Mbappe te nei mah se an tum ram an thleng rih lo. PSG an vanduai tia sawi theih a ni a, chutih rualin goal khat an chhuah hnua an chet buai chhunzawm dan thlir chuan UCL champion tur chuan an rilru a la huaisen tawk lo niin a lang.

Striker ṭha mi Benzema
Chawlhlawk lai khan chak tur a chiang tawh, mahse Karim Benzema-a'n ngaihdan dang a nei. Minute 17 chhung lekin engkim a thlak danglam vek a, kum 34 leh ni 80 mi hi Champions League-a hattrick siam thei upa ber a ni ta hial.

France international hian season kal laia inelna hrang hrangah goal 28 a khung tawh. Real Madrid chu La Liga hmahruaitu a nih pui bakah Champions League quarterfinal a luh pui a, a chet dan avangin fak a phu - fakna pawh a dawng hnem hle.

English football legend Gary Lineker chuan, "Hnial rual lohin Karim Benzema hi khawvela number 9 ṭha berte zinga mi a ni," tiin twitter lamah a tarlang a, a ngaihdan ṭawmpuitu an tam khawp ang.
Spanish club ropui Real Madrid tana goal khung hnem lamah pawh Benzema hian pathumna dinhmun a luah. Goal 309 khungin Alfredo Di Stefano chu goal khatin a khum, a chungah huan Raul Gonzalez (323 goals) leh Cristiano Ronaldo (451) te an awm.

Benzema chuan, "Real Madrid tana goal khung tam pathumna ka ni hi ka lawm, ka la duh tawk mai lo. Goal tam zawk khung belh zel ka la duh," tiin a sawi a, a mellung phun tawhsa hi a la sawn hla zel ang.
"Striker ṭha ni turin theihna a nei kim," tiin Arsene Wenger khan a lo fak tawh. Benzema hian a hun hmasa lamah amah aia player langsar a khelh pui ṭhin, penalty pawh a chang ngai lo, goal khung tura ball pek hnem ber a ni ngai lo bawk.

Chawm hlawh ber ni lo mah se goal a khung zel a, a kum tam hnuah a chungah mawhphurhna rit zawk a tla. A mawhphurhna hi zo takin a hlen chhuak a, player ṭha Ronaldo chhuah hnuah pawh Real hian goal khung kawngah buaina an nei lo - Benzema an neih vang a ni.