UK-in Abramovich a hrek; Chelsea an buai

Russia-in Ukraine a run avangin United Kingdom sorkar a che na tawlh tawlh a, Russian mi hausa pasarih a hrem zingah Chelsea neitu Roman Abramovich a tel.

UK sorkar chuan Abramovich hi an ram chhunga zin thei lo tura an hren bakah, an rama a thil neih zawng zawng chu khawih chet theih lohin an hrensak a, Chelsea buaina a zual zel.

UK prime minister Boris Johnson chuan, "Russia nunrawnna thlawpute tan hahdamna a awm tur a ni lo a, vawiina kan hmalakna hi Ukraine kan thlawpzia lantirna a ni.

"Nunau pawisawilote nunna la a, damdawi in suasam a, dik lo taka roreltuten ke an pen theih nana tha thawhtute chungah zah kan ngai dawn lo," a ti a, Abramovich bakah hian Igor Sechin, Oleg Deripaska, Andrey Kostin, Alexei Miller, Nikolai Tokarev leh Dmitri Lebedev te chu UK sorkar hian a hrek.

Hrek ang!
Abramovich hian talbuai thei a ni tih inhriain thlatir khan Chelsea hi a lo zuar tawh a, mahse, a hralh hman lo - sorkarin a hrek takah chuan London club pawh hi a hralh thei rih dawn lo tihna a ni a, a lei duhtu lam pawhin an nghah a ngai dawn.

Hei hi chu Chelsea tan thil pawi lutuk lo anga sawi theih a ni a, a aia pawi zawk chu lei leh hralh hrim hrim an ti thei dawn lo. Season ticket lei tawhte chuan season tluanin inkhel an en thei ang a, mahse, inkhelh dawna zawrh chawp ṭhin ticket erawh hralhchhuah a rem tawh dawn lo.

Club sumdawnna zawng zawng khar vek tur a ni a, London club hian jersey leh sumdawnna thil dang an zawrhchhuah a rem tawh rih lo tihna a ni a, hei hian sum lamah na takin a nghawng ang.

UK sorkar chuan Chelsea hian player leh staff te hlawh a pek theih nan special licence erawh an pe tel dawn a, hei bakah hian inkhelh hmabak an la neihte chu an khelh an phalsak dawn bawk.

Hloh rawh se...
BBC Football correspondent Simon Stone chuan, "Hetianga thutlukna siam a nih chhan chu Abramovich-a sum lakluhte a kiam theihna tur a ni ber," a ti a, UK sorkar hian Russia president Vladimir Putin-a ṭhian hnai, sumdawng hausate hi a hrek ta a ni.

The Times chanchinbua chief sports reporter ni lai Martyn Ziegler-a'n a sawi dan chuan Chelsea hian player lei leh hralh pawh an thei dawn lo a, contract thar chungchangah pawh indawrna an kalpui thei dawn lo.

Chelsea player zingah Antonio Rudiger, Andreas Christesnen leh Cesar Azpilicueta te chu season tawp ruala contract hmang zo tur an ni a, contract thar an ziak thei rih dawn lo tihna a ni.

Blues hian season ticket lei fans eng zat nge an neih an tarlang lo a, kum 2020-a Birmingham Mail-in survey a neih ṭum kha chuan Chelsea fans 28,000-in season ticket an nei a, fans 41,837 lenna Stamford Bridge hi ruak lutuk tur chu a ni lo.

Sorkar zahngaihna
UK hian na taka Abramovich hrem an duh rualin fans an ngaihtuah tel lo thei lo a, BBC Sport senior news reporter Laura Scott chuan, "Sorkarin thutlukna siam mah se, nakinah chuan licence hran pe a, club hralh a nih theih dan sawi turin an inhawng ang," a ti.

US-a hmunpui nei Raine Group chuan Chelsea zawrh hi an buaipui mek a, March 15 thleng hun an hawng. Tun dinhmunah club lei duh mi/pawl 20 vel an awm nia sawi a ni a, mahse, heng ho pawh hi an inbiakpui thei rih dawn lo tihna a ni.

Chelsea fan ruhkawl, British mi Nick Candy chuan thurualpui tur zawng chungin, Blues hi lei a tum a, ani bakah hian Swiss mi hausa Hansjorg Wyss & US mi Todd Boehly, Turkish sumdawng Muhsin Bayrak, New York Jets neitu Woody Johnson leh Saudi Arabia lamte chu hming langsar an ni.

UK culture secretary Nadine Dorries chuan, "Kan tum ber chu Putin-a sorkar chet lak theih nana puitute hrem a ni. Kan thutlukna hian Chelsea leh fans-ah nghawng a nei ngei ang tih kan hria a, club leh national game ten ṭul loa an tawrh ve loh nan uluk takin ngaihtuahna kan seng a ni," a ti.

Chelsea & Special Licence
• Chelsea hnuaia hnathawk zawng zawng, player leh coaching staff telin, hlawh pek theih an ni ang.
• Inkhel tura an zinchhuahnaah awmze neia sum an hman phalsak a ni a, mahse, match khata an kal leh haw lam man chu £20,000 (Rs. nuai 20.10) aiin a sang tur a ni lo.
• Stamford Bridge-a inkhelh a nih dawn reng rengin, an sum sen chuan £500,000 (Rs. nuai 502.72) a pel thiang lo.
• March 10, 2022 hmaa match ticket leh season ticket neite chuan inkhel a hmunah an en thei ang.
• Broadcasters-ten Chelsea inkhel eng pawh an pe chhuak thei ang.