ISL semifinal-ah Mizo an intawng dawn

Indian Super League semifinal pawh a hmawr an bawk dawn hnai ta a, zanin dar 7:30 hian semifinal hmasa zawkah Jamshedpur FC leh Kerala Blasters an intawng dawn.

Jamshedpur-in Mizo defender pathum, Ricky Lallawmawma, Laldinliana Renthlei leh PC Laldinpuia te an kawl a, Kerala Blasters lamah K. Lalṭhathanga (Puitea) a awm thung.

Mizo tana chanchin lawmawm pakhat chu hei hi a ni - Mizo player-te hian an club khelhnaah hmun pawimawh an chang a, Mizoram Premier League aṭanga an career ṭan vek an ni bawk.

ISL semifinal a nih tawh avangin inkhel boruak a ṭang dawn tih a chiang a, Mizo player-te pawhin inṭhianṭhatna dah ṭhain, team tan theihtawp an chhuah dawn - a hmuhnawm loh ring suh.

Thawnthu hlui
League round-ah team pahnih hi vawi hnih an lo intawng tawh a, Jamshedpur an chungnung zawk - an intawn hmasak zawkah 1-1 in an inhnehtawk a, a hnuhnung zawkah 3-0 in Jamshedpur an chak.

Hriat tel atana ṭha erawh 3-0 a Men of Steel an chak ṭum hian Kerala Blasters-in hliam leh hrem avangin an ṭhat dan berin an khel lo a, zaninah tlawm nawn an tum dawn lo.

Blasters midfielder Puitea chuan, "JFC hi team ṭha tak an ni a, mahse, hneh tur khawpin kan ṭha tawk. A awlsam dawn lo tih chu ka hria a, mahse, kim loa kan khelh ai chuan a danglam tawh ang," tiin Vanglaini a hrilh.

Pre-season ah pawh khan Jamshedpur leh Blasters hi an lo intawng tawh a, friendly match mai a ni chungin mi pahnihin red card an hmu - zanin an inkhelhna tur hi semifinal a ni a, Puitea chuan,"Kan boruak a 'hot' lo ngai lo a, a hmuhnawm khawp ang," a ti.

Ṭhian = hmelma
Zanina intawng tur Mizo player-te inhrechiang sa an ni a, Puitea chuan, "Mizo tamna team an nih avangin league hmahruaitu ni chunga season khar thei Jamshedpur ka lawmpui. Mizo player-te hi ka ṭhiante vek an ni.

"Dinliana nen phei chuan Pachhunga University College leh Bethlehem Vengthlang thlengin kan khel ho a, Dinpuia lah kan veng (BVT) pa a ni a, Ricky nen kan inhre ṭha em em bawk," a ti a, mahse, zaninah erawh hmelhriat ṭha induhsak hun a ni lo.

Puitea hian hliam tenau nei mah se harsatna a awm thut a nih loh chuan Blasters tan bul a ṭan ngei a rinawm a, league match 20-a bul ṭan vek Ricky chuan Men of Steel tan bul a ṭan leh bawk ang.

Dinliana erawh Hyderabad nen an intawn ṭuma a lo tihnat tawh, a dar chu league match hnuhnung berah a ti na leh a, zaninah bul a ṭan theih a rinawm loh. Armed Veng South tlangval aiah Dinpuia'n bul a ṭan a rinawm.

Men of Steel
Bolton Wanderers coach hlui Owen Coyle enkawlna hnuaiah Jamshedpur an vul - league hmahruaitu an ni mai lo, league round-ah goal chhuah tlem ber an ni a, goal khung tam ber dawttu an ni bawk.

Tlarhnungah captain Peter Hartley hoin an khawng leh dawn tih a chiang a, Sunderland academy aṭanga inzir chhuak defender dinpui turin Ricky, Dinpuia leh Santos defender hlui Eli Sabiá te an awm.

Daniel Chima Chukwu-a'n season ṭantirah East Bengal tan khel mah se January-ah JFC a zawm a, match kuaah goal sarih a khung nghal - tun seasin ISL-a pem fuh bera chhal ngam a ni.

Rangers aṭanga an lakluh Greg Stewart hi Blasters tan ven uluk bik ngai tur a ni. Kum 31 mi forward hian match 19-ah goal 10 leh assist 10 a nei a, a tlangnel hle. MLS lama hming lo chher tawh, midfielder Alexandre Lima hian match 20-ah goal khat leh assist pali a nei a, midfield-ah a hnawk leh dawn.

Blasters ṭhatna
Kerala club tan midfield-ah Puitea chu an khaipa a ni a, match 17-ah assist vawi thum a nei tawh. Melbourne City midfielder hlui Adrian Luna hian match 20-ah goal nga leh assist vawi sarih a nei bawk.

Sahal Abdul Samad a la hmuhnawm reng a, Indian midfielder ṭhangduang hian match 20-ah goal nga leh assist vawi khat a nei tawh. Espanyol forward hlui Alvaro Vazquez hian match 20-ah goal riat khungin assist vawi khat a nei tawh.

Tlarhmaah Jorge Diaz hian match 18 khelin goal riat a khung tawh a, assist vawi khat tho a nei bawk - tlarhnung khawng ṭha Jamshedpur-in forward ṭha pahnih inkawp hi an dang thei dawn em, en a châkawm tawh.

Kum 21 mi goalkeeper Prabhsukhan Gill hi lam hmaih a thiang lo a, Croatia tana vawi li inlan thei Marko Leskovic leh Manipur defender ṭhangduang Ruivah Hormipam te a hmaah an din dawn bawk avangin JFC tlarhma tan hna a hautak dawn.

ISL Semifinal
First Leg
Zanin Inkhel Tur
Jamshedpur 7:30 PM Kerala Blasters

March 12, Inrinni Zan
Hyderabad FC 7:30 PM ATK Mohun Bagan

Second Leg
March 15, Thawhlehni Zan
Kerala Blasters 7:30 PM Jamshedpur FC

March 16, Nilaini Zan
ATK Mohun Bagan 7:30 PM Hyderabad FC

March 20, Pathianni Zan - Final

*Away goal rule hman a ni lo
*Inkhel pahnih belhkhawma goal khung tam zawkin final an lut ang.