A thiam pariat zingah Manchester City

Manchester City-in harsatna nei loin Champions League quarterfinal an inpetkai a, Pep Guardiola hote hian last 16-ah Sporting Lisbon an hneh.

Etihad Stadium-ah Man City leh Sporting te hi Nilaini zan khan goal awm loin an inhnehtawk a, amaherawhchu English club hi khualmualah 5-0 a hnehna an chan tawh avangin aggregate-ah 5-0 in an chak.

Europe-a inelna sang berah club lian Real Madrid, Bayern Munich, Liverpool leh Man City ten quarterfinal an lut tawh. Manchester United vs Atletico Madrid, Ajax vs Benfica, Juventus vs Villarreal leh Lille vs Chelsea ten karleh hian last 16 an khel dawn a, team la dam thlir hian champion a har dawn tih a chiang.

City an insiksawi
Man City-in hrem vangin Kyle Walker an chhawr thei lo a, hliam vangin Joao Cancelo an chhawr thei lo bawk. Player ṭha awm lo vanneihpuitu chu CJ Egan-Riley a ni a, kum 19 mi English defender hian inkhel bul a ṭan.

Khualmualah 5-0 in chak tawh mah se Pep Guardiola-a'n inelna a la thutak tih lantirin Egan-Riley chhiar tel loin player dang 10 chu a chhawr ṭhan vek a luhtir.

Second half-ah erawh player khel ngai lo leh naupang zawk khelhna hun an siamsak. Veteran keeper kum 36 mi Scott Carson pawh second half-ah a inlan a, kum 19 mi James McAtee pawhin second half-ah Phil Foden a thlak.

Kum 18 mi defender Luke Mbete pawhin Aymeric Laporte a thlak a, Spanish manager-in academy chhuak player a hmang ṭangkai.

Goal a lut lo
Man City-in first leg ang thoin inkhel an thunun a, Raheem Sterling-a'n Gabriel Jesus cross ṭha zet chu goal-ah a chantir thei lo. English forward hi goal hmaah a vanduai a, keeper Antonio Adan chauh a hmachhawn hnuah pet khum tum mah se keeper hian a dang hman.

Second half-ah substitute Riyad Mahrez rawn che ṭha nghalin Jesus-a goal khung tur a siamsak a, Brazilian forward hian a pet goal ṭha bawk. Amaherawhchu VAR hmanga ennawn hnuah offside vangin pawm a ni lo.

Man City-in goal khung lo mah se inkhel an thunun a, mual laiah Fernandinho a che ṭha. Brazilian midfielder hian ball tel leh tel loin khelmualah team kaihruaitu a ni tih a pholang.

English club hian October hnuah a vawi khat nan goal an khung lo a, chutihrualin an tum erawh an hlawhtling. Inkhelh ṭan hmain Sporting tan quarterfinal kawngka kharsak an ni tawh a, second leg bika chak tur pawhin Man City tlarhnung an su hawng thei lo.

Eng nge an sawi?
Man City manager Pep Guardiola chuan, "Kum 10 chhunga kan club thlen chin hi thlirlet ila, hma sawn zawngin kan kal zel a ni. Tunah chuan Champions League kan khel chauh a ni lo a, last 16 hi kan khel deuh ziah. Tunah quarterfinal kan thleng leh a, Europe-a team ṭha pariat zingah kan tel," tiin hma an sawn thu a sawi.

Sporting coach Ruben Amorim chuan, "Inkhel harsa tak a ni a, second half-ah hma kan sawn hret. Chutihrualin team ṭha tak kan hmachhawn a, kan tlawm loh avangin kan lawm. Kan khelh danah kan lungawi," tiin a sawi.

UCL Last 16
First leg
February 15, Thawhlehni
Paris Saint-Germain 1–0 Real Madrid
PSG: Kylian Mbappe 90+4'
Sporting Lisbon 0–5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'
February 16, Nilaini
RB Salzburg 1–1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0–2 Liverpool
LFC : Roberto Firmino 75'; Mohamed Salah 83'
February 22, Thawhlehni zan
Chelsea 2–0 Lille
CHE: Kai Havertz 8'; Christian Pulisic 63'
Villarreal 1–1 Juventus
VIL: Dani Parejo 66'
JUV: Dusan Vlahovic 1'
February 23, Nilaini zan
Atletico Madrid 1–1 Manchester United
ATM : Joao Felix 7'
MNU : Anthony Elanga 80'
Benfica 2–2 Ajax
BEN : Sebastien Haller 26' (OG); Roman Yaremchuk 72'
AJX : Dusan Tadic 18'; Sebastien Haller 29'
Second Leg
March 8, Thawhlehni Zan
Bayern Munich 7–1 Red Bull Salzburg
BAY: Robert Lewandowski 12' (P), 21' (P), 23'; Serge Gnabry 31'; Thomas Müller 54', 83'; Leroy Sané 85'
RBS: Maurits Kjærgaard 70'
Agg-ah Bayern 8-2 in an chak
Liverpool 0–1 Inter Milan
INT: Lautaro Martínez 61'
Agg-ah Liverpool 2-1 in an chak
March 8, Nilaini zan
Real Madrid 3–1 PSG
RMA : Karim Benzema 61', 76', 78'
PSG : Kylian Mbappe 39'
Agg-ah Real Madrid 3-2 in an chak
Manchester City 0–0 Sporting Lisbon
Agg-ah Manchester City 5-0 in an chak
March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica
March 16, Nilaini zan
Juventus 01:30 AM Villarreal
Lille 01:30 AM Chelsea
*UCL-ah away goal rule a awm tawh lo.
*Second leg hi March thlaah khelh a ni ang.
*Quarterfinal a?angin draw neih ?hat leh tur a ni a, tute pawh an inhmachhawn thei ang.