Aizawl FC hmaa ding tur RoundGlass Punjab

Tun season I League-ah Mizo club Aizawl FC chiahin point an la hmu lo. NorthEast aṭanga champion tawh awmchhun Aizawl FC hian vawiin tlai dar 4:30 hian RoundGlass Punjab an hmachhawn dawn a, table mawngphah aṭanga tal chhuak turin chak an mamawh.

Tlai dar 2:00-ah Trau leh Churchill Brothers te an inkhel dawn a, zanin dar 7:30-ah Real Kashmir leh Sreenidi Deecan te an inkhel bawk ang. Covid-19 hri leng vangin I League hi Kolkata-ah nghah a ni a, khawtual club Mohammedan chiah match thum khelh tawha chak vek an la awm.

Beiseina a chuai
Aizawl FC-in an match hmasa berah Real Kashmir an hneh lo a, nikum December thlaa inkhelah hian foreinger leh an player ṭha an chhawr theih loh avangin Mizo club hi insiamṭha mai tura ngaih an ni. January leh February thla khan Aizawlah training an nei chhunzawm a, February 21-a team thlahna hun R. Dengṭhuama Indoor Stadium kawta hman ṭum pawhin beiseina a sang hle.

Aizawl FC coach Yan Law chuan, "Kan squad neihah ka lungawi. I League tawnhriat nei ṭha foreigner kan nei a, Mizo player-te an ṭha bawk. Champion thei tur squad kan nei a, nomawi chawi ngei kan tum," tiin Kolkata an pan dawnah Vanglaini a hrilh.

Amaherawhchu, Mizo club hian Mohammedan SC 2-0 in an hneh lo a, I League kai thar Rajasthan FC 1-0 in an hneh lo leh bawk. Aizawl FC hi match thum a zawna an chak tawh loh avangin nomawi sawi ngam chi an ni tawh lo a, beiseina a chau ta hle.

Insiamṭhat hun
I League hi season liam ta aṭang khan inkhelh dan thlak danglam a ni a, hmun khatah chauh khelh a nih avangin vawi khat ṭheuh an inkhelh chhuah zawhah group hnihah ṭhenhran an ni. Tun ṭumah hian a sang pasarihin Championship stage an khel ang a, champion tur an zawng dawn.

A mawng lam team parukin relegation stage an khel thung ang a, relegate tur an zawng thung ang. Season liam ta khan Aizawl FC hian Championship stage hi an khel pha tawh lo a, tun ṭumah hian relegation stage khel leh thei dinhmunah an ding.

Mizo club tan insiamṭhatna hun a la awm a, Championship stage khel zinga an tel duh a nih chuan RoundGlass Punjab aṭangin an insiamṭhat a ngai ang. Coach Yan Law tan chanchin lawmawm a awm a, Covid-19 vanga match hnuhnung pahniha inlan thei lo player pathum an dam tawh.

Striker Aser Pierrick Dipanda, forward Samuel Lalmuanpuia leh midfielder Ayush Chhetri te hi bul ṭan thei tura theihna nei vek an ni a, an pathum hian result tidanglam thei an ni. Amaherawhchu Mizo club khingpui tur RoundGlass Punjab hian an match hnuhnung berah Kenkre 4-0 in an sawp a, pahnihnaah an awm mek bawk avangin tawh an khirh khawp ang.