Novak Djokovic a inhnukdawk!

Rilru a thlak duh lo a, sorkar thuneitu lamin a tan kawng an siamsak bik lo - a tuartu chu Novak Djokovic a ni. Vaccine a lak duh miau loh avangin, loh theih lohna avangin Indian Wells leh Miami Open aṭangin a inhnukdawk.

United States inkaihhruaina danah chuan ram pawn mi an rama zin lut tur tan Covid-19 laka invenna vaccine lak a ngai; state hrang hrangin thuneihna an nei hran leh a, ram chhung mi zawm tur pawh a hranin an siam ṭhin.

Indian Wells leh Miami Open hian tournament khel tur zingah Djokovic hi an telh. Amaherawhchu, tournament buatsaihtu hi sorkar thuhnuaia awm an ni a, khualzin luh dan chungchangah thuneihna an nei ve lo.

Serbian star Djokovic chuan, "Indian Wells leh Miami Open-ah telh ka ni, mahse ka zin ve theih hmel ta lo. Sorkar lamin kalphung tih danglam an neih loh avangin ka tan US-ah a inkhelh theih dawn loh. Inelna ropui tak pahniha inlan turte duhsakna ka hlan," a ti.

Thla hmasa khan Novak hian vaccine lak tumna a la neih chuan loh thu a sawi a, invenna damdawi lak kher ai chuan tournament khelh loh mai a thlan zawk thu a sawi bawk. Covid-19 inkaihhruaina a zalen deuhna ramah chauh a inkhel thei rih dawn.

Tuna a lan dan chuan April thlaa khelh tur Monte Carlo Masters chu Djokovic inlan theihna tur hmasa a ni. France pawhin inkaihhruaina an siam danglam a nih chuan French Open a khel thei ang, tuna an kalphungah erawh a khel thei dawn lo.

Grand Slam vawi 20 champion tawh Djokovic hian a ngaihdan a thlak a nih loh chuan a la tuar zel dawn niin a lang. A elpui player langsar dangte chuan vaccine an la mai a, harsatna nei loin inelna an hmachhawn thei.

Season kal laiah Djokovic hian tournament pakhat chiah a la khel. Dubai Tennis Championship a khel a, inelna a hmachhawn tlem avangin a inkhelin tun hma a phak rih lo, kum 34 mi a nih tawh avangin atan hun paih a uiawm zual tawh.

Tournament a khelh tlem avangin ranking lamah pawh a tlahniam, Russian tlangval Daniil Medvedev chuan number 1 dinhmun a lo chhuhsak tawh. Indian Wells leh Miami Open-ah Medvedev hi chu a inlan thung dawn a ni.