Vardy a chawl rih dawn

Hliam vanga hun rei tak a chawlh hnuah Jamie Vardy a lo kir a, mahse tunah chuan a khup hliam vangin a chawlh leh rih a ngai dawn. A chawlh chen tur erawh an la sawi chiang thei lo thung.

English striker hian kumina a vawi khat nan Pathianni zan khan Premier League-ah inkhel bul a ṭan, Foxes hi Leedes United lakah 1-0 in an chak. A malpui hliam dam tawh mah se a khup vangin a chawlh leh rih a ngai dawn tihna a ni.

Leicester manager Brendan Rodgers chuan, "A khupah an hliam palh, chawlhkar li vel hnuah chuan a dam leh mai kan beisei," a ti a, season chawhnu lam hun pawimawh laia an chan leh tur hi an ui khawp ang.

Vardy hi kum 35 mi ni tawh mah se a la hriam reng. Season kal laiah inelna hrang hrang match 24 aṭangin goal 12 a khung a, club tana goal khung hnem ber a la ni reng.

Tun dinhmunah chuan Rodgers-a tan Patson Daka, Kelechi Iheanacho, Ademola Lookman leh Ayoze Perez te chu tlarhma lama chhawr theih an ni.