Lyon leh Frankfurt te an chak

Europa League last 16-ah Lyon leh Eintracht Frankfurt ten khualmualah Porto leh Real Betis an hneh a, an mualah second leg an khelh dawn avangin quarterfinal lut turin an dinhmun a ṭha.

Ningani zanah Europa League hi khelh ṭhin a ni tlangpui a, nizan khan last 16 match dang panga khelh a ni. Second leg hi March 17, Ninganiah khelh a ni ang.

Estádio do Dragao-ah Porto leh Lyon te an inkhel tawk a, first half-ah chance ṭha an nei ve ve chungin goal a lut lo. Minute 59-naah Moussa Dembélé siamsak chu Lucas Paqueta-a'n a khung a, offside vangin pawm ni lo zet mah se VAR hmanga en hnuah goal-ah an pawm.

Minute li hnuah Porto-in ball-in Paqueta kut a per avangin penalty an hmu a, referee-in thil thlen dan a ennawn hnuah penalty a sut. Sérgio Conceicao hoten an nawr chhunzawm a, hun tawp hma deuhin Chancel Mangulu volley goal hmangin siphurh an sut. Amaherawhchu offside vangin pawm a ni lo a, Porto an vanduai.

Benito Villamarín-ah mikhual Eintracht Frankfurt-in bul an ṭan ṭha zawk a, minute 14-na lekah Filip Kostic shot-cross chu a goal. Mualneitu Real Betis tan Nabil Fekir-a'n mawi zetin minute 30-naah a hlai lut a, 1-1 a ni. Amaherawhchu minute hnih hnuah Daichi Kamada-a'n Frankfurt hmahruaina goal a khung.

German club-in second half-ah penalty an hmu a, Borré Maury-a'n petin Betis keeper Claudio Bravo-a'n a dansak. Barcelona keeper hlui penalty dan zarah Real Betis tan quarterfinal luh a la beisei theih ang.

Europa League Last 16
March 9, Nilaini zan
Porto 0 - 1 Lyon
LYO : Lucas Paqueta 59'
Real Betis 1 - 2 Eintracht Frankfurt
RBE : Nabil Fekir 30'
EIN : Filip Kostic 14'; Daichi Kamada 32'