Police leh Electric Veng zaninah bukin an awm dawn

Mc Dowell's No. 1 Soda Mizoram Premier League-ah round khat chiah khelh tur a awm tawh a, semifinal khel tur a la chiang lo cheu. Zanin dar 7:30 hian Mizoram Police leh Electric Veng te an inkhel dawn - 'quarter final' a ni ber!

Tlai dar 2:30-ah Chawnpui leh Ramhlun North an inkhel dawn a, relegate tur leh him chin tur thliar felna a ni ang.

Electric a êng leh ta
Nilaini zan khan Electric Veng leh Chawnpui FC ten Lammualah inkhel hmuhnawm tak an lantir a, Vanlalsawma Colney hoten 2-0 a hnehna changin Chawnpui par an thliak. Chawnpui FC-in MPL season khatnaah semifinal lut zo lo mah se paruknaan ni chiang tawh a, season tawp thlenga knockout stage luh beiseina nei thei khawpin an che ṭha tluan a, an thlen chinah an lungawi ang.

Chawnpui FC-in semifinal lut turin chak an mamawh tih an hria a, ṭan phat aṭangin na takin an nawr a, Electric Veng keeper Lalrinnunga Hnamte a khelh ṭhat avangin K. Roluahpuia leh Vanlalthanga ten goal an khung thei lo. Electric Veng erawhin first half-ah vawi hnih chance an nei a, goal-ah an chantir ve ve. Minute 14-naah Chawnpui keeper Thomas Lalthlamuana nam chhuah fuh tawk lo chu R. Lalthanmawia'n (Amawia) a tauh lut.

EFC goal hmaah an hriam zui a, minute 25-naah Isak Vanlalpeka ball pek fing tak chu Vanlalremsanga'n goal-ah a chantir a, dinhmun ṭha takah an ding. Hun tawp thlengin Chawnpui FC-in goal khung tumin an nawr na a, amaherawhchu man of the match-a thlan Vanlalremruata hoin Electric Veng an ṭang tluan a, goal an chhuah lo. Lammualah Electric Veng mipui an thawm a ring a, entu an neih ṭhat avangin Serchhip aṭanga zin haw hnuah a vawi khat nan hnehna an chang.

A la zo lo
Electric Vengin match hnuhnung berah semifinal lut tura an elpui Mizoram Police an hmachhawn dawn avangin pathumna dinhmun hauh lailawk mah se league round zawhah panganaa la awm thei an ni.

EFC tan semifinal lut turin Police laka point khat hmuh chhuah a tawk a, an vanneih chuan point hmu lo pawh ni se Inrinni zana Chanmari FC-in Aizawl FC an hneh loh chuan EFC hian knockout stage an lut dawn tho.

Vanlalsawma hote hi midang result-ah innghah an tum lo a, Police laka hnehna chan ngei ngei an tum. EFC coach Sawma chuan, "Police nen hian kan inzawm ṭha hle. Anni hian training-na hmun tur ground kan neih loh pawhin min kian ṭhin a, an chungah hian kan lawm em em a ni. Amaherawhchu khelmual chhungah erawh ṭhat chhuah kan tum lo a, hneh ngei kan tum," tiin a khingpui tur chungchang a sawi.

Electric Mipui
Electric Veng player-te an ṭha a, chutihrualin Police player tawnhriat ngahte nena khaikhin chuan team tenau zawka ngaih theih an ni. Chuvangin EFC-in an hmachhuan tur chu an veng mipui an i a, Lammual mawi tham mipui an pun khawm phawt chuan semifinal an hnaih sawt ang.

Coach Sawma chuan, "Chawnpui nena kan inkhelh khan K. Kawla Stand-ah kan veng mipuite kan ngenna angin an ṭhu khawm ṭha a, kan chakna chhan pawh an ni. Police nen hi chuan mipui tam zawk kan mamawh dawn a, kan ṭan ho ṭhat chuan MPL vawi khat khelhnaah semifinal kan thleng thei a ni," tiin Vanglaini a hrilh.

Police thlirna lam
Mizoram Police-in an match hnuhnung bera Aizawl FC an hneh loh avanginsemi final lut lo thei dinhmunah an ding a, chuvangin Electric Veng lakah hian rawng huai an ser a ṭul a, thapui an chhuah a ngai bawk.

Police coach Lalbiaksanga Colney chuan, "Sawma'n kan chunga lawmthu a sawina kha TV aṭangin ka lo thlir a, an puitling hlein ka hria. Tunah erawh khelmualah kan intawng dawn a, kan chet danah lawmthu min hrilh nawn ka ring tawh lo," tiin an elpui chunga ṭhat chhuah an tum loh thu a sawi.

Police hian Aizawl FC an hneh loh ṭumin defender ṭha Lalrinzuala Khiangte an chhawr thei lo a, tunah erawh kim ṭhapin an khel thei tawh dawn a, Mizo player ṭha an tam avangin EFC hian mipui ṭawiawmna nen Electric Veng hmachhawn dawn mah se rinkai zawk an la ni tho ang.

Inkhel pawimawh, 'MPL quarter final' a ni ber e.

Ramhun North hi...
Ramhlun North-in relegation playoff khel pha chiang turin vawiin tlaia Chawnpui FC an hmachhawn hunah point khat tal an hmuh a ngai a, point an hlawh chhuak a nih chuan Bethlehem Vengthlang an relegate dawn.

Chutihrualin Chawnpui FC hian hnehna chang pawh ni se BVT-in an match hnuhnung bera Chhinga Veng an hneh loh chuan Ramhlun North hi pasarihnaah awmin relegation playoff an khel tho dawn a ni.