Spurs khelmualah hmahruaitu Liverpool

Zanin dar 11:00-ah Premier League inkhel hmuhnawm a awm dawn a, Tottenham Hotspur chuan hmahruaitu Liverpool an mikhual dawn. 

Liverpool-in league match 20 an khelh tawhah tlawm an la nei lo a, point 60 hlawhchhuah theih aṭangin 58 an nei a, team ṭha an ni tih hai rual a ni lo. 

Tottenham erawh Jose Mourinho hnuaia insiamṭhat tum, beisei anga kal chak hleithei lo an ni a, Liverpool lakah an chak phawt chuan player rilru thlengin thui tak nghawng a nei ang. Mahse, Reds hi eng team mahin tun season Premier League-a an la hneh loh a nih miau avangin a harsa dawn a, Jurgen Klopp-a naute hian 'tlawm' dan an theihnghilh tawh!

Spurs manager Jose Mourinho chuan, "Liverpool hi world champion an ni mai lo a, ka ngaihdan chuan khawvela team ṭha ber an ni mek," tiin an mikhual tur club a fak. 

Liverpool hian tun season-ah UEFA Super Cup leh Club World Cup nomawi an chawi tawh a, Premier League, Champions League  leh FA Cup-ah champion an la beisei vek bawk. Klopp-a'n FA Cup third round-a Everton an hneh ṭumin a players ṭha rual a chawlh hahdamtir a, Sadio Mane, Mohamed Salah leh Roberto Firmino dan tum a châkawm dawn lo. 

He team hian Virgil van Dijk, Alisson leh season hmasa league ṭantir aṭanga Premier League assist ngah ber  Trent Alexander-Arnold (20) leh Andrew Robertson (17) an kawl tel tih hriat a ṭha. 

Spurs fan-tena an mitthla chak loh ber chu Harry Kane tel loa club ṭha hmachhawn a ni ngei ang a, zaninah an striker chhuanvawr tel lo hian Liverpool an mikhual dawn.

Southampton laka an chak loh ṭuma inhliam Kane hi April thleng chu London club hian an chhawr thei dawn lo tih a chiang tawh a, tun season-a club tana goal 17 khungtu striker tel loin Spurs hi an hriam lo sawt ang. 

Mourinho chuan, "He club tana a ṭangkaizia chu mi zawng zawngin an hre vek a ni," tiin a striker chungchang hi a lo sawi tawh a, Son Heung-min, Lucas Moura leh Dele Alli ten goal khung an uar a ngai tihna a ni. 

Spurs player zingah  Moussa Sissoko, Tanguy Ndombele,  Hugo Lloris, Danny Rose leh Ben Davies te an la inhliam vek a, kim chunga an ngam hleihtheih loh Liverpool hi 'kim lo' a ngam a harsa ang!

Tottenham leh Liverpool lo inhmachhawn tawhna keu let chuan Spurs fans tan lawmna tur a awm lo a, "Sawi nawn leh rawh," tih ai chuan, "Min hrilh suh, thawnthu hlui," tih chu a thunawn atana duhawm zawk a ni. 

March 2013 hnu khan team pahnih hi vawi 16 an intawng tawh a, Spurs hi vawi khat chiah an la chak ve - October 2019 kha an intawn hnuhnung ber a ni a, Anfield-ah 2-1 in Liverpool an chak. Mahse, Spurs fan-ten tun thlenga rilru dam theih lohna pakhat an nei a, chu chu season hmasa Champions League final-a Liverpool an ngam loh kha a ni. 

Premier League-a vawk lal len mek Liverpool champion-na tur kawng daltu nih hi Spurs chak ber a ni dawn a, Liverpool hliam let duhin zaninah theihtawp an chhuah ang.