AFC-in I League hmahruaitu an hlau lo

I League hmahruaitu Chennai City chuan league match khel turin Aizawl an lo thleng a, vawiin chawhnu dar 2:00 hian table mawngphaha awm Aizawl FC nen an intawng dawn.

Chennai coach Akbar Nawas chuan, "Eng inkhelah mah chak sa an awm ngai lo. Game zawng zawng hi a hautak em em vek a, a hautak dan a inang lo mai chauh zawk a ni. Kan result neih sate ngaihtuah loin kan khel ang a, AFC zah tak chungin hnehna chan kan tum ang," tiina sawi.

Aizawl FC coach Gift Raikhan-a'n Chennai City a hlau bik lo a, "Chennai hian goal an khung thei tih kan hria. Mahse, min attack dawn avangin keini pawhin kan attack ang a, point thum hlawhchhuah ngei kan tum ang," a ti a, "Min ṭawngṭaipui rawh u," tiin Mizo mipui a sawm bawk.

Mangang suh u!

Aizawl FC hian tun season I League-ah match li an khel tawh a, point hnih chiah an la nei. Mahse, Gift chuan an result avanga chi ai lo turin mipui a chah a, thlawpna ṭha an mamawh thu a sawi.

Gift chuan, "Season hmasaa Neroca ka enkawl lai khan match li-ah kan tlawm a, mahse pahnihna ni chungin season kan la khar tho a ni. Match khelh tur tam tak a la awm a, sang takah kan tawp thei tih ka hria.

"Mahse, heng zawng zawng ti tur hian mipui ṭawiawmna kan mamawh a, min thlawp tlat kan ngai a ni. Keini hna chu kan theihtawp chhuah a ni a, chumi ti tur chuan fan-ten phurna min pek a ngai a, lo la chi ai suh u," tiin a sawi.

AFC leh 100%

Aizawl FC hian match hmasa berah Shillong Lajong an ngam lo a, Mohun Bagan nen an inhnehtawk zui. Neroca nen home match hmasa ber an khel a, an inhnehtawk a, Minerva lakah an mualpho.

Gift chuan, "Ka player-te hian 100% pe se ka duh ber a, khelmual an rah tawh chuan thisen chhuak khawpin an ṭang ngam tur a ni. Bagan lakah khan 100%-in kan khel a, Minerva lakah chu inpekna chu kan hmu lo thung.

"Ka player zingah hian tumah khel chiang sa an awm lo a, an theihna zawng zawnga khel tur apiang an lut ang. Player senior leh foreign player an nih avang ngawtin tumah lut chiang sa an awm lo a, a khel ṭha apiang chu lut tur an ni," tiin a sawi.

Thusawi dikna

Aizawl FC coach-in player khel

ṭha apiang an luh tur thu a sawi a, a thusawi dikna hmuh turin a awm - Mizo goalkeeper Lalawmpuia chuan niminah press conference a hmachhawn a, Opa hian AFC tan si ban a nghak dawn.

Minerva laka bench lama ṭhu tluan Albert Zohmingmawia'n inkhel bul a

ṭan dawn chiang a, bench aṭanga luhtir Lalrinfela chuan inkhel bul a ṭan dawn bawk. Gift hian Minerva nena an inkhelh ṭumin a foreigner neih a sawisel tawh a, vawiinah pawh 'a ṭhen' chu bench-ah a dah tur thu a sawi.

Gift chuan, "A ṭhenin bul an ṭan ang a, a ṭhen chu bench-ah an awm ang," a ti. Captain Alfred Jaryan leh Ansumana Kromah chu bul ṭan chiang tura beisei an ni a, Leonce Dodoz leh Bektur Talgat Uulu ten bench lamah hun an hmang a nih pawhin a mak lo ang.

Spanish football

Chennai City-in Spanish player pali an kawl a, Spanish football-ah second division khel ṭhang ṭhiau an nih avangin an thiam a, Chennai City attacking game mawi tak siamtu ber an ni.

Mahse, East Bengal lakah captain leh player pawimawh Pedro Manzi chu hliam vangin lakchhuah a ni a, Chennai coach Akbar chuan, "Engmah sawi theih a la ni lo," tiin Pedro inlan dawn leh dawn loh a sawi thei lo.

Pedro bakah hian defender Roberto Eslava chu season hmasa lawka Spanish third division club Unionistas tana regular taka khela second division-a inhlankaipuitu a ni a, midfielder Sandro Rodriguez hi Spanish football division hniam lama a hun hmang char char a ni a, midfielder Nestor Gordillo hi Atletico Madrid B team tana khel tawh a ni bawk.

Chennai coach Akbar Nawas hi Singapore mi niin season hmasa tawp lam aṭang khan Chennai City a enkawl ṭan a, Asian club ṭha Tampines Rovers leh Filipino club langsar Global Cebu pawh lo enkawl tawh a ni.

Team Dinhmun
# Team P W D L GF GA GD Pts
1 Chennai City FC 4 3 1 0 11 6 5 10
2 Quess East Bengal 3 2 0 1 6 3 3 6
3 Mohun Bagan 3 1 2 0 5 3 2 5
4 Gokulam Kerala FC 4 1 2 1 7 6 1 5
5 NEROCA FC 4 1 2 1 3 3 0 5
6 Minerva Punjab FC 3 1 1 1 2 2 0 4
7 Real Kashmir FC 3 1 1 1 1 2 -1 4
8 Churchill Brothers 3 0 3 0 2 2 0 3
9 Shillong Lajong FC 4 1 0 3 4 8 -4 3
10 Indian Arrows 3 1 0 2 2 6 -4 3
11 Aizawl FC 4 0 2 2 4 6 -2 2