Semifinal-ah Djokovic
World number 1 Noval Djokovic chuan Alexander Zverev hnehin ATP Finals khelh laia semifinal in vaw kai thei hmasa ber a ni. Serbian tlangval hian Nilaini zan khan German tlangval hi 6-4, 6-1 in a hneh a ni.
O2 Arena, London-a inkhelah Djokovic leh Zverev te hi set khatnaah an inkhel tawk hle, mahse set hnihnaah erawh tawnhriat nei ṭha leh tun hnai khel ṭha tak Djokovic a chungnung viau. An group match inkhel dangah Marin Cilic-a'n John Isner a hneh avangin a tlang theih phah.
Kum 31 mi Djokovic hian a group match hnuhnung ber atan zanin dar 1:30 hian Cilic a hmachhawn ang a, semifinal luh beiseina la nei pahnih Zverev leh Isner te an intawng bawk ang.
Grand Slam vawi 14 champion tawh Djokovic chuan, "Chawlh lak hun a la ni lo, inelna a la zawh miau loh avangin rilru fim taka awm hun a ni. Zverev nen kan inkhel tawk viau a, chutih rualin hun pawimawh laia tihsual a nei zauh ṭhin kha ka vanneih phah hle," a ti. Zverev hian vawi 33 ngawt unforced errors a nei a, a chak loh chhan langsar a ni.
Inkhel dangah Marin Cilic chuan dinhmun duhawm loh taka awm tawhna aṭang tho chhuak turin Isner chu 6-7 (2-7), 6-3, 6-4 in a hneh. Anni pahnih inkhel hi tun ATP Finals bika set thum an khelhna hmasa ber a ni hial.
Player an inkhing tawk a, a ṭha fal sawi theih a ni rih lo. Vawi hnih chak tawh Djokovic a tlang nghal laiin a dang pathum - Cilic, Isner leh Alexander Zverev te chuan an group match hnuhnung bera an chetṭhat dana zirin semifinal an la inhlangkai thei vek a ni.
US Open 2014 champion Cilic chuan, "Inkhel harsa tak a ni, a bik takin set khatna tie break kha a harsa zual hle. John khan a khel ṭha em em a, ani hian service a neih ṭhat chungchuan em avangin hmachhawn a harsa ṭhin.
"Mahse harsa tak karah pawh dawhthei takin ka nghak hram hram a, unforced errors a neih bakah double faults a nei leh zauh ṭhin khan min pui hle a ni," tiin a khingpui hneh tura vanneihna a mamawh tel thu a sawi.
ATP Finals-ah hian tun season chhunga player che
ṭha zual, ranking sang pariat an inlan. Hliam vangin Rafael Nadal leh Juan Martin del Potro te an inlan thei lo thung, player pariat hi group pahnihah ṭhen niin; an inkhelh kual hnuah a sang pahnih zelin semifinal an lut dawn a ni.