Serpents hnehin Tuikual an tlang

Mizoram Super League season kal laiah semifinal khel tur pathum a chiang tawh. Nilaini zan inkhelah Tuikual South chuan 97-75 a Zarkawr Serpents hnehin a thiam pali zingah an tel tih an nemnghet.

Champion lai Zarkawt BCA leh Khatla TBL ten semifinal an lut tawh bawk a, nizan khan Mission Veng Vikings-in BC Bethlehem lakah hnehna an chang a nih chuan semifinal an lut ve bawk ang.

Zanin hian league round khelh zawh a ni dawn, semifinal khel tur chiang tawh mah se zanina an inkhel result a zir hian an khingpui tur a chiang dawn - inkhel a la pawimawh vek tihna a ni. Tlai dar 5:30-ah Serpents leh TBL an inkhel ang a, zan dar 8:00-ah TKS leh BCA an intawng thung dawn a ni.

Phuba lak hun?

MSL season hmasa khan Tuikual South hian final-ah zarkawt BCA an hneh loh a, tun ṭuma an intawh leh turah hian hnehna chan ngei an tum.

Tuikual manager Lalremsiama Hrahsel chuan, "Nikum inkhel pawimawhah kan hneh lo a, season opening-ah erawh kan chak thung. Hei vang hian hneh theih an ni tih kan chiang a, zaninah phuba lak ngei kan tum ang," tiin Vanglaini a hrilh.

Phengphehlep hian Desmond Antwine Medder leh Shashank J Rai te an lalut a, season danga state pawn player an lakluh ṭhin ai chuan an hmang thiam rih niin a lang. Anni pahnih bakah hian F. Zodinthara, Lalnunpuia Renthlei, Lalfakzuala leh Lalfakmawia te an khel ṭha ṭhin hle.

BCA an ṭha

Zarkawt BCA hian champion lai ni chungin season bul an ṭan a, match hmasa pathumah an chak vek avangin semifinal lut hmasa ber an ni. An match hnuhnung berah Mission Veng Vikings an hneh lo thung, zaninah chak loh nawn an duh lo ang.

BCA coach Lalruatfela chuan, "Vikings laka kan chak loh kha inthlahdah vang a ni lo a, theihtawp kan chhuah hnuah kan chak lo. A tawp lama tihsual zeuh kan neih vang chauh a ni," tiin Vanglaini a hrilh tawh, MBBA Season Opening semifinal-a an ngam loh TSK hneh an tum dawn a ni.

Zarkawt team hian state pawn player chu nei ve bawk mah se, tualchhung player an neih ṭhat Lalrina Renthlei, Zonunsanga leh Matthew Remthluanga Sailo te chu an rinrawl an ni a, zaninah erawh rokhawlhna dang avangin Matthew an chhawr thei lo ang.

16 November, Zirtawpni
Zarkawt Serpents 5:30 PM Khatla TBL
Tuikual South 8:00 PM Zarkawt BCA