Tu nge Jokanovic hnung zui dawn?
Premier League mawngphaha awm mek Fulham-in coach Slavisa Jokanovic chu a hna aṭangin an chawlhtir a, a hmun ruak luah tur hian Premier League-a Leicester City champion pui tawhtu Claudio Ranieri chu ruat a ni.
Fulham-in coach thar an neih rualin Premier League club dang engzatin nge a hnung zui dawn, tih chu zawhna awm nghal a ni a, Fulham chauh lo pawhin coach thar an nei a nih pawhin a mak lo ang.
Tun dinhmunah table-a a hniam panga (15-20) hoin hnehna an chan tawh belhkhawm chu pasarih chiah a ni a, an vaia an match khelh tawh zat belhkhawm chu 60 a ni - hemi in a kawh chu 'coach ban an la awm leh ngei dawn' tih hi a ni!
October leh November international break hi 'in ban kar' tia sawi a ni hial ṭhin a, Jokanovic hnung zuitu an awm ngei a rinawm.
A hma chuan...
Season hmasa kha kan thlir chuan Premier League match 12 hnu lawkah manager pangain ban an tawk der tawh a, Frank de Boer (Crystal Palace), Craig Shakespeare (Leicester), Ronald Koeman (Everton), Slaven Bilic (West Ham) leh Tony Pulis (West Brom) te chuan ban an tawk fel der tawh.
2017-18 season-a match 12 hnua manager ban tawk panga hi tam viau angin a lang a ni mai thei - mahse season thum dangah manager paruk ngawt match 12-ah ban an lo ni daih tawh.
Kuminah manager pakhatin ban a tawk ta a, enge an an zel dawn a la hriat loh. Season
ṭan dawn khan Chelsea, West Ham, Everton leh Arsenal ten manager an thlak a, Fulham nen tun season-ah club parukin manager an thlak ta.
Tun hnai season thum chhung khan season tinin manager 13 zel thlak an ni a, tun hnai kum 10 chhunga season khata manager inthlak tlem ber chu 2009-10 kha niin manager pakua chiah thlak an ni - tun season hi inthlak tlem ber ṭum ni thei dinhmunah a ding mek.
Team talbuai chu
Premier League table hnuai lamah team pathum Southampton, Huddersfield leh Fulham an awm a, heng team-te hian match khat ṭheuh bak hnehna an chang lo.
Nipui transfer laia pound maktaduai 100 ngawt sengtu Fulham-in khelmualah an sum sen hnem an lantir thei lo a, Premier League-ah goal 31 chhuaha chhuah hnem ber ni mekin table mawngphah an luah - a tuartu chu coach a ni ta.
Fulham hian match 12 aṭanga point nga neiin match khatah 0.42 zel point nei ang an ni a, Fulham chung chiahah hian point sarih nei Huddersfield an awm a, match khata 0.58 point nei zel ang an ni.
Cardiff, Southampton leh Crystal Palace ten match khat zela 0.66 zel point nei ang an ni a, tun hnai kum nga chhunga table-a 17-na luah reng rengin match khatah point 0.94 zel nei ang an ni.
Hemi awmzia chu season dang nena khaikhin Premier League-a him tur chuan a hnuai lam club hian an point hmuh zat hi 0.94-ah tal match khat zelah an tihsan a ngai tihna a ni a, hemi damdawi ṭha ber chu manager thlak a ni.
A hunah tak?
October leh November international break hi manager thlakna remchanga an hman chhan ver ber chu coach thar tan team zirchianna remchang a ni a, a hun mamamwh zat season laklawh laia a neih theihna a ni ṭhin bawk.
Premier League season 10 liam ta kan en chuan October leh November-a manager thlak 14 zinga 13 chuan an manager ban laia an position aia sang vekah Premier League an khar.
October/November-a manager ban zingah West Brom chiah an manager ban lai aia season khar chhia an awm a, season hmasa khan an relegate.
Premier League club beisei phak lo ten thawnthu hlui an keu let ang a, season tawpah chuan tuna PL manager hi kan hmu vek tawh kher lo mai thei - Fulham pawhin beiseina sang tak an nei.
Kum 10 chhunga October/November-a manager ban leh thlaktu
Manager ban Thlaktu Club Season Ban laia Season
Dinhmun Kharna
Juande Ramos Harry Redknapp Tottenham 2008-09 20th 8th
Paul Hart Avram Grant Portsmouth 2009-10 20th 20th
Steve Bruce Martin O'Neill Sunderland 2011-12 16th 13th
Roberto Di Matteo Rafael Benitez Chelsea 2012-13 3rd 3rd
Mark Hughes Harry Redknapp QPR 2012-13 20th 20th
Ian Holloway Tony Pulis Crystal Palace 2013-14 19th 11th
Brendan Rodgers Jurgen Klopp Liverpool 2015-16 10th 8th
Dick Advocaat Sam Allardyce Sunderland 2015-16 19th 17th
Tim Sherwood Remi Garde Aston Villa 2015-16 20th 20th
Francesco Guidolin Paul Clement Swansea 2016-17 17th 15th
Craig Shakespeare Claude Puel Leicester 2017-18 18th 9th
Ronald Koeman Sam Allardyce Everton 2017-18 18th 8th
Slaven Bilic David Moyes West Ham 2017-18 18th 13th
Tony Pulis Alan Pardew West Brom 2017-18 17th 20th