Davis Cup final khel tur player an puang

Ram leh ram mipa tennis team hmanga inelna Davis Cup chu kar leh tawpah final khelh a ni dawn a, nomawi inchuh tur France leh Croatia te chuan an ram team aiawh tur player hming an tarchhuak.

Kum 118 chhung zet an lo kalpui tawh Davis Cup-ah hian champion lai France chuan 1930 hnua champion zawn thei hmasa ber nih an tum dawn a, chutih rualin an player ṭha ṭhenkhat chu hliam vangin an chhawr thei dawn lo.

Richard Gasquet, Gael Mon­fils leh Gilles Simon te an inlan theih dawn loh avangin world number 32 Lucas Pouille chungah mawhphurhna a lian dawn a, captain Yannick Noah bakah doubles player Pierre-Hugues Herbert leh Nicolas Mahut ten an nomawi kawl lai humhim an tum dawn a ni.

Croatia lam erawhin an ṭhat dan berin an khel thei dawn, captain Zeljko Krajan kaihhruaina hnuaiah Marin Cilic leh Borna Coric te chu an hmachhuan tur an ni dawn a, anni bakah hian Franko Skugor, Mate Pavic leh Ivan Dodig te an la neih bawk avangin 2005 hnua a vawi khat nan champion leh an tum ngam.