Zaninah MPL semifinal khel tur hriat kim dawn ; Chanmari FC Vs Aizawl FC
Mizoram Premier League-a knockout stage awm aṭanga la thleng pha ziah Chanmari FC chu semifinal thleng pha lo thei dinhmunah an ding a, zanin dar 8:00 hian Aizawl FC nen an inhmachhawnang.
Tun season-ah champion lai Chhinga Veng FC leh I League club AFC ten semifinal an lut tawh a, nizan khan Mizoram Police leh Electric Veng inkhelin pakhat zawkin knockout stage an nemnghet ang. Chanmari FC hian tun dinhmunah pangana dinhmun hauh mek mah se zanina hnehna an chan hrim hrim chuan semifinal an lut dawn a, nizan inkhela chak zawk an awm lo a nih chuan draw pawhin palina dinhmun an hauh theih dan a awm bawk.
AFC B Team
Aizawl FC-in I League-ah mangchhia an nei mek a, match nga an khelh aṭanga chak hmel an hmuh tawh loh avangin champion beiseina a bo tawhah ngaih theih hial. Amaherawhchu an dinhmun chhe tak aṭanga hawi tho veng theihna chu MPL a ni a, Mizoram chhunga league sang berah match li chhung an chak zawn tawh.
Mak ang reng tak chu Aizawl FC boss Gift Raikhan-a'n match hnuhnung paliah player nem zawka ngaih a chhawr a, I League club khel tur player ṭha ṭhenkhat a awltir chungin hnehna an chang vek. B Team tiha chhal team hian hnehna an chan vek avangin A Team aiin an result aṭanga thlir chuan an ṭha zawk.
Aizawl FC coach Gift Raikhan chuan, "I League khelh zawh chiahah inkhel dang kan nei lehnghal a, Chanmari FC nen chuan player dang an rawn inlan ang. Ka naute chungah hian rinna kan nghat ngam a, heta khel ṭha chu I League khelh hma bakah inlanna hun ka siam sak ang," tiin chak tuma an khelh tur thu a sawi.
Gift-a thusawi dikna hi a lang chho a, MPL-a khel ṭha keeper Lalawmpuia, midfielder Paul Ramfangzauva leh wing back Lalramhmunmawia te chu Chennai City hmachhawn tura luhtir a ni.
Chanmari lam hi
Chanmari FC-in season ṭantirhah MFA Super Cup final lut mah se I Day Football-ah knockout stage an paltlang thei lo a, MPL-ah palina china awm an harsat bawk.
Serchhip-a round 7 khelhah champion lai Chhinga Veng an hneh loh avangin coach Lalruatliana Sailo aiah Chawngthansanga an lalut a, amaherawhchu season chanve chinah hian palina an ni. Chawnga hnuaiah nung takin khel mah se result ṭha neih an harsat a, khelmuala an hmuhnawm loh hnuah result ṭha nei chhoin match hnuhnung bera Bethlehem Vengthlang hneh tur pawhin an vannei hle.
Chanmari caoch Chawngthansanga chuan, "BVT kan hneh danah khan inlungrualna ka hmu a, hun tawp thlengin kan theihna zawng zawng kan chhuah a, point thum kan sual chuak. Aizawl FC nen pawh ṭan hona ṭha kan mamawh a, kan ṭanrual chuan point thum kan hlawh chhuak thei ang," tiin Vanglaini a hrilh.
Aizawl FC chungchang sawi zuiin Chawnga chuan, "I League club an nia, an squad a chhah avangin tute pawh lut se khelh an harsa vek dawn. Hneh sa a awm thei lo a, point thum nei tur chuan kan sual chhuah a ngai ang," tiin an khingpui tur an ṭhat thu a sawi.
Chanmari FC-in MPL-ah sulhnu ṭha tak an nei a, Aizawl FC nen chiah vawi hnih champion thei an awm a, an hun tawn san lai ber hian entu mipui an nei ṭha ṭhin. Zanina I League club hneh an duh a nih chuan Chanmari FC hian ṭantu an neih ṭhat a ṭul ang.