Chennai danglamna foreigner ṭha

Aizawl FC-in nimin khan I League hmahruaitu Chennai City an mikhual a, 2-1 in an hneh lo. Mikhual team tan Spanish player Sandro Rodriguez chuan goal hnih a khung a, Mizo club tan Ansumana Kromah chuan goal khat a khung ve bawk.

RG Stadium, Mualpuia inkhelah hian AFC-in bul an ṭan ṭha a, minute thum chhungin goal chance vawi thum an hlah an hman a, Leonce Dodoz te goal hmaah an hriam tawk lo. Chennai tan erawh Spanish player pathum defender Roberto, midfielder Sandro leh winger Nestor Jesus te an ṭangkai takzet a, inkhela danglamna thlentu an ni.

Minute 49-naah Sandro hian box pawn aṭangin freekick mawi zetin a khung a, Kromah hmangin Mizo club-in minute 72-naah sut mah se Chennai City-in Romario Jesuraj tlan chakna hmang ṭangkaiin minute 77-naah an vaw let a, Sandro-a'n chakna goal a khung.

Nimin inkhel entu zat hi official-a tarlan dan chuan 1690 chauh a ni a, Aizawl FC-in result an neih ṭhat loh avangin inkhel entu an kiamah a ngaih theih. AFC coach Gift Raikhan chuan, "Kei hi mawhphurtu chu niin ka thiam loh a ni," tiin a sawi.

Amaherawhchu Gift hi insawifiah zuiin, "Inkhela danglamna chu foreigner a ni. Kan foreigner ten chance an hlah laiin anni foreigner-te chuan goal an khung. Goal khung thei player kan mamawh a, club thuneitute pawh ka dil ang. Kan la thei lo a nih chuan tuna kan neih sa nen hian result ṭha thei ang ber neih kan tum dawn a ni," a ti.

Aizawl FC hian match ngaah point hnih chauh an la hmu a, Chennai City erawhin match nga

aṭangin point 13 an hlawh chhuak a, hmahruaitu an ni mek. Chennai hian tun season-ah Spanish player pali an lalut a, AFC an hmachhawn ṭumin forward leh forward ni bawk Pedro Manzi a khel lo.

# Team P W D L GF GA GD Pts
1 Chennai City 5 4 1 0 13 7 6 13
2 East Bengal 3 2 0 1 6 3 3 6
3 Churchill Brothers 4 1 3 0 6 4 2 6
4 Mohun Bagan 3 1 2 0 5 3 2 5
5 Gokulam Kerala 4 1 2 1 7 6 1 5
6 NEROCA FC 4 1 2 1 3 3 0 5
7 Minerva Punjab 3 1 1 1 2 2 0 4
8 Real Kashmir 3 1 1 1 1 2 -1 4
9 Indian Arrows 3 1 0 2 2 6 -4 3
10 Shillong Lajong 5 1 0 4 6 12 -6 3
11 Aizawl FC 5 0 2 3 5 8 -3 2