Quarterfinal-ah Srikanth leh Sameer

Indian shuttler ṭha pahnih Kidambi Srikanth leh Sameer Verma te chuan an khingpui ve ve hnehin Hong Kong Open World Tour Super 500 tournament khelh mekah quarterfinal an lut.

Seeded palina Srikanth hian India tlangval ve tho H.S. Prannoy chu 18-21, 30-29, 21-18 in a hneh a, Commonwealth Games silver medal latu hian Japan tlangval Kenta Nishimoto leh Thailand tlangval Kantaphon Wangcha­roen te inkhela chak zawk a hmachhawn leh ang.

Mipa singles inkhel dangah Sameer chuan inkhelh hah ngai loin hnehna a chang a. A khingpui tur Olympic champion tawh Lin Dan chu hliam vangin a inhnukdawk a, Hans-Kristian Solberg Vittinghus leh tualchhung player Lee Cheuk Yiu te inkhela a chak zawk a hmachhawn leh dawn a ni.

Olympic medallist shuttler P.V. Sindhu erawhin beisei ang result a nei thei lo. World number 4 Sindhu hi tun ṭumah hian seeded pathumna niin champion tura rinkai ni mah se, Korean nula Hyun Ji Sung lakah 24-26, 20-22 a chak loin second round-ah a zinkawng a tawp.

India tlangvalte che fuh rih mah se nula lam erawh an thleng sang ta lo, Sindhu tlak hma hian London Olympic bronze medalist Saina Nehwal chu a tla tawh bawk a, hmeichhe singles huangah Indian shuttler dam an awm tawh lo.

Mixed doubles pair Satwiksairaj Rankireddy leh Ashwini Ponnappa te ṭangdun pawh 17-21, 11-21 in Chinese Taipei mi Lee Yang leh Hsu Ya Ching te lakah an tlawm a ni.